Mingəçevir şəhərindəki “Kür” Olimpiya Mərkəzində keçirilən MDB Oyunlarında Azərbaycan karateçiləri uğurlu nəticələr əldə ediblər.

Milli komanda ümumilikdə 16 medal –  6 qızıl, 3 gümüş və 7 bürünc qazanaraq yarışda iştirak edən federasiyalar arasında lider mövqeyə yüksəlib.

Qızıl medallara Turqut Həsənov (84 kq), İrina Zaretska (68 kq), Fərid Ağayev (75 kq), Mədinə Sadıqova (55 kq), Nuran Rzazadə (67 kq) və Roman Heydərov (fərdi kata) sahib olublar. Asiman Qurbanlı (+84 kq), Fərid Savadov (60 kq) və Nəzrin Piriyeva (55 kq) gümüş, Aysu Əliyeva (61 kq), Fərid Şahbazlı (84 kq), Rəşid Süleymanov (75 kq), İnci Əzizova (50 kq), Aslan Dostuyev (67 kq), Ramilə Heydərova (kata) və Rövşən Əliyev (kata) isə bürünc medallara layiq görülüblər.

Federasiyadan bildirilib ki, nəticələr baş məşqçilərin və rəhbər heyətin sistemli hazırlıq işlərinin nəticəsidir. Kişilər üzrə baş məşqçi Şahin Atamov, qadınlar üzrə baş məşqçi Şahin Xudaverdiyev, kata üzrə baş məşqçi Vahid Ayvazov və böyük məşqçi Rəşad Hüseynovun peşəkarlığı komandanın yüksək hazırlığını təmin edib.

MDB Oyunları öncəsi Türkiyənin Marmara bölgəsində və Azərbaycanın Qusar rayonunda təşkil olunan təlim-məşq toplanışlarının idmançıların fiziki və texniki hazırlığının gücləndirilməsində mühüm rol oynadığı vurğulanıb.

Azərbaycan Karate Federasiyasının açıqlamasında qeyd olunub ki, qazanılan uğurlar dövlətin idmana göstərdiyi diqqət və dəstəyin bariz nümunəsidir. Bu nailiyyətlərin karate idman növünün ölkədə inkişafı və beynəlxalq miqyasda uğurlu çıxışları üçün yeni imkanlar yaratdığı da diqqətə çatdırılıb.

Sentyabrın 19-21-də Mingəçevir şəhərində “Olimpiya Ümidləri” beynəlxalq karate turniri təşkil olunub. Yarış Gənclər və İdman Nazirliyinin, Azərbaycan Karate Federasiyasının və Avropa Karate Federasiyasının təqvim planına uyğun olaraq “Kür” Olimpiya İdman Tədris Mərkəzində baş tutub.

Turnirdə Azərbaycan, Türkiyə və Küveytdən ümumilikdə 300 idmançı uşaqlar, yeniyetmələr və gənclər arasında mübarizə aparıb. Komanda hesabında Azərbaycan birinci, Türkiyə ikinci, Küveyt isə üçüncü olub.

Açılış mərasimi Azərbaycan Respublikasının Dövlət Himninin səsləndirilməsi və Vətən uğrunda şəhid olanların xatirəsinin bir dəqiqəlik sükutla yad edilməsi ilə başlayıb.

Açılış mərasimində Azərbaycan Karate Federasiyasının vitse-prezidenti, 8-ci dan qara kəmər sahibi Füzuli Musayev çıxış edərək idmançıları salamlayıb, Federasiya prezidenti ÜlviQuliyevin salam və təbriklərini iştirakçılara çatdırıb.

Füzuli Musayev qeyd edib ki, ölkəmizdə idmana dövlət səviyyəsində göstərilən yüksək diqqət və qayğı nəticəsində Azərbaycan dünya idman xəritəsində öz layiqli yerini tutub. “Cənab Prezident İlham Əliyevin rəhbərliyi ilə idman siyasəti uğurla həyata keçirilir, müasir idman infrastrukturu yaradılır, beynəlxalq yarışlara yüksək səviyyədə ev sahibliyi edilir. Bu gün ölkəmiz təkcə regionda deyil, bütün dünyada idman ölkəsi kimi tanınır”, – deyə vitse-prezident vurğulayıb.

O, 3-cü MDB Oyunlarının məhz Azərbaycanda keçirilməsinin dövlətimizin idman sahəsində qazandığı etimadın göstəricisi olduğunu xüsusi diqqətə çatdırıb: “MDB məkanında belə mötəbər yarışa ev sahibliyi etmək Azərbaycanın idman ənənələrinin gücləndiyini, ölkəmizin beynəlxalq arenada nüfuzunun artdığını bir daha nümayiş etdirir. Bu, həm də Azərbaycan gəncliyinə, idmançılarımıza verilən dəyərin bariz nümunəsidir”.

Füzuli Musayev çıxışının sonunda bütün iştirakçıları mübarizədə fəal olmağa, ədalətli oyun prinsiplərinə sadiq qalmağa çağırıb və idmançılara uğurlar arzulayıb.

O həmçinin qeyd edib ki, bu turnir III MDB Oyunlarına hazırlıq məqsədilə test xarakteri daşıyıb. Təşkilat Komitəsi sınaq xarakteri daşıyan yarışın yüksək səviyyədə keçirilməsi üçün böyük zəhmət sərf edib və üzərinə düşən vəzifələrin öhdəsindən layiqincə gəlib.

Qalib və mükafatçılar federasiya tərəfindən xüsusi hazırlanmış medal və diplomlarla təltif olunublar. Yarışı beynəlxalq dərəcəli hakimlərlə yanaşı, respublika dərəcəli hakimlər də idarə ediblər. Ümumilikdə turnirdə 23 hakim fəaliyyət göstərib.

Qocyu-ryu karate üslubu üzrə (idman karatesi – WKF qaydaları) XXI Avropa çempionatı və birinciliyində uğurlar qazanan Azərbaycan idmançıları Heydər Əliyev adına Beynəlxalq Hava Limanında qarşılandı.

Onları Federasiya prezidentinin köməkçisi Vüsal Abdullazadə, idmançıların ailə üzvləri və idman azarkeşləri böyük sevinc və fəxrlə qarşıladılar.

Qeyd edək ki, Rumıniyanın Timișoara şəhərində 10-14 oktyabr tarixlərində keçirilən mötəbər yarışda, nümayəndə Nurlan Quliyevin rəhbərliyi altında iştirak edən komandamız yüksək nəticələrə imza ataraq üçrəngli bayrağımızı ucaldıb.

III MDB oyunlarına hazırlıq məqsədilə idman karatesi (WKF) üzrə Azərbaycan milli komandası Türkiyəyə yola düşüb.

Yığmamız avqustun 21-dən 24-dək İstanbul şəhərində təşkil olunacaq “Uluslararası Marmara Cup Turnuvası” beynəlxalq yarışında gücünü sınayacaq. Ardınca isə avqustun 25-dən 31-dək “Gənclik Kampı” təlim-məşq toplanışlarında iştirak edəcək.

Milli komanda baş məşqçi Şahin Atamovun rəhbərliyi altında turnir və hazırlıq prosesinə qatılacaq.

Azərbaycan Respublikası Dövlət İmtahan Mərkəzinin təşkilatçılığı, Gənclər və İdman Nazirliyinin nümayəndəsinin iştirakı ilə iki gün müddətində Azərbaycan Karate Federasiyasının ekspertləri tərəfindən (Allahverdi Rüstəmov, Qabil Sayadov, Həmid Məmmədov, Əhməd Əfəndi və Oqtay Məmmədov) İdman Akademiyasına qəbul edilən abituriyentlərlə qabiliyyət imtahanları keçirilmişdir.

Dövlət İmtahan Mərkəzi və Gənclər və İdman Nazirliyinin nümayəndələri 120 abituriyentin iştirak etdiyi imtahan prosesinin tam obyektiv, şəffaf və ekspertlərin peşəkarlığı ilə keçirilməsinə yüksək qiymət vermişlər.

Qabiliyyət imtahanlarının uğurla başa çatmasına görə Azərbaycan Karate Federasiyasının rəhbərliyinə və komissiya üzvlərinə təşəkkürlərini bildirmişlər.

 

Çin Xalq Respublikasının Çengdu şəhərində keçirilən 2025-ci il Dünya Oyunlarında Azərbaycan Karate Federasiyasının idman karatesi (WKF) üzrə milli komandasının üzvü İrina Zaretska növbəti uğurunu qazanıb.

Milli komandamızın üzvü -68 kq çəki dərəcəsində yüksək ustalıq nümayiş etdirərək ardıcıl qələbələr qazanıb və final mərhələsinə vəsiqə əldə edib. Həlledici görüşdə İrina Zaretska İsveçrə təmsilçisi Elena Quirici ilə qarşılaşıb. Gərgin idman mübarizəsi şəraitində keçən final qarşılaşmasında idmançımız rəqibinə məğlub olaraq gümüş medalla kifayətlənib.

Qeyd edək ki, İrina Zaretska analıq məzuniyyətinə qədər uzun müddət bu çəki dərəcəsində dünya reytinqinin lideri olub. Beynəlxalq arenaya qayıtdıqdan sonra da yüksək idman forması nümayiş etdirən karateçimiz hazırda dünya reytinqində ikinci yerdə qərarlaşıb.

Karateçimizi yarışlarda milli komandamızın baş məşqçisi Şahin Atamov müşayiət edib.

İrina Zaretskanın qazandığı bu uğur Azərbaycan idmançılarının beynəlxalq yarışlarda uğurlu çıxışlarının davamı kimi qiymətləndirilir və ölkəmizin idman şöhrətinin daha da möhkəmlənməsinə xidmət edir.