19-20 oktyabr 2024-cü il tarixlərində Azərbaycan Karate Federasiyasının təqvim-planına uyğun olaraq, Qazax Olimpiya İdman Kompleksində Şəhid Abadov Şahin Hüseynəli oğlunun xatirəsinə həsr olunmuş ənənəvi karate üslubu fudokan üzrə turnir keçirilib.
Turnirdə Bakı, Sumqayıt, Gəncə şəhər, Salyan, Şirvan, Ağcabədi, Tovuz, Qazax və Ağstafa rayonlarından 15 komanda olmaqla 100-dən çox idmançı iştirak edib.
Turnirdə Azərbaycan Respublikasının Dövlət himni səsləndirilib, Azərbaycan xalqının ümummilli lideri Heydər Əliyevin, Azərbaycan Respublikasının müstəqilliyi və ərazi bütövlüyü uğrunda canlarını fəda etmiş şəhidlərimizin xatirəsi bir dəqiqəlik sükutla yad olunub. Turnirin açılışında Qazax-Tovuz Regional Gənclər və İdman İdarəsinin rəisi Əziz Məsmalıyev, Karate Federasiyasının region nümayəndəsi Əziz Əzizov, şəhid Ramiz Mustafayev adına Ağstafa Fudokan Mərkəzinin rəhbəri Samir Ələkbərov, “Qarabağ Əlillərinə Qayğı” İctimai birliyinin Ağstafa rayon təşkilatının sədri Ceyhun Əliyev, Əfqanıstan veteranları İB-nin sədri Mirzahid Hacıyev, Şəhid Şahin Abadovun oğlu Cavidan Abadov, Şəhid qızı Nəcmiyyə Sədizadə, Şəhid anası Mahnur Mustafazadə çıxış edərək şəhidlərimizin xatirəsinə həsr olunmuş bu kimi yarışların keçirilməsinin əhəmiyyətindən danışıblar.
Turnirdə şəhidlərimizin valideynləri və qazilər iştirak ediblər. Turnirdə yüksək nəticə əldə edən idmançılara Azərbaycan Karate Federasiyasının təsis etdiyi diplom və medallar təqdim olunub.
Diplom və medalları idmançılara şəhid anaları və qazilər təqdim edib.
