Azərbaycan Karate Federasiyasının

fəaliyyətinin təşkili barədə

TƏLİMAT

Ümumi müddəalar (çıxarış; 4, 16, 19-23)

4. Hüquq və intizam komitəsi.

• Federasiyanın fəaliyyətinin müvafiq hüquqi aktlar, norma və qaydalara həmçinin Federasiyanın Nizamnamə müddəaları və bu Təlimatın tələblərinə uyğun təşkil edilməsi, hüquqi, etik və intizam qaydalarının profilaktikası məqsədilə Federasiyanın İdarə heyəti sədr və iki üzvdən ibarət olmaqla 5 il müddətinə “Hüquq və intizam” komitəsini yaradır və aşağıdakı vəzifələrin icrasını həvalə edir:

• Federasiyanın fəaliyyətinin təşkili ilə əlaqədar müvafiq normativ aktların hazırlanmasında iştirak edir;
• Federasiya və onun struktur qurumları və üslubların fəaliyyətləri ilə bağlı hüquqi yardımlar etməklə metodiki rəhbərlik edir;
• Federasiyanın struktur qurumları və üslublarda əmək intizamının və digər qanun pozuntularının profilaktikasını aparır, maliyyə və əmək intizamının möhkəmləndirilməsi, idmançıların, məşqçi-müəllim və hakimlər heyətinin hüquqlarının mühafizəsi sahəsində fəaliyyət göstərir;
• Müəyyən edilmiş qaydaya müvafiq olaraq baş vermiş neqativ halların, etik normaların, icra və nizam-intizamın pozulması və digər qayda və normaların pozulması baş verdikdə müvafiq araşdırmalar apararaq işçilərin, idmançı və digər iştirakçıların inzibati, maddi və tənbeh tədbirlərinə cəlb edilməsi üçün müvafiq hüquqi sənədləri tərtib edir;
• Federasiya tərəfindən müxtəlif təşkilat və orqanlarla bağlanan müxtəlif təyinatlı müqavilələrin hazırlanmasında iştirak edir, əsaslandırılmış hüquqi rəy verir;
• Müxtəlif dövlət və aidiyyatı orqanlardan daxil olan və göndərilən (xaric olan) sənədlərin vaxtında icrası və tələb olunan qayda və normalara uyğun tərtibatına metodiki rəhbərlik edir;
• Federasiyanın tərkibinə daxil olan üslublarla idarəetmənin tənzimlənməsi, qarşılıqlı fəaliyyət, öhdəlik və vəzifələrin müəyyən edilməsi məqsədilə müqavilələrin hazırlanmasında rəy və təkliflər verməklə iştirak edir;
• Federasiya idman, ictimai, maliyyə-təsərrüfat fəaliyyəti barədə hesabatların tərtib edilməsində iştirak edir;
• Federasiyanın idman tədbirlərində (yarışlar, təlim toplanışları və d.) iştirakçılar (idmançılar, hakimlər, məşqçi-müəllim və digər işçilər) tərəfindən yol verilmiş qeyri-etik davranışa, insan ləyaqətini alçaldan hərəkətlərə və təhqirə yol verdikdə, idmançıya yaraşmayan tərzdə davranışa, yarış iştirakçılarına qarşı irqi, cinsi, dini və etnik zəmində ayrı seçkilik nümayiş etdirərsə həmçinin bu federasiyanın Nizamnamə və Təlimatın müddəalarının pozulması halları baş verərsə intizam tənbeh, cəza tədbirlərinin tətbiq edilməsi üçün müvafiq tədbirlər həyata keçirir;
• Federasiyanın idarə heyətinin digər müvafiq göstəriş və tapşırıqlarını icra edir;
• Fəaliyyəti barədə illik analitik arayışlar tərtib edir;
• Federasiyanın üzvləri (üslublar, struktur qurumları, idmançıları, hakim və məşqçiləri və digərləri) tərəfindən funksional vəzifələrinin cari fəaliyyət dövründə keçirilən idman tədbirləri (yarışlar) zamanı Federasiyanın daxili intizam qaydaları və tələblərin pozulmasına səbəb olan neqativ halların baş verdiyi zaman daxil olmuş müraciət əsasında hadisələri araşdırır və nəticələrindən asılı olaraq müvafiq tənbeh tədbirinin tətbiq edilməsi barədə İdarə heyətinə müvafiq müraciət və təqdimatlar hazırlayır.
  • İnzibati-tənbeh cəza tədbirlərinin tətbiq edilməsinə əsas verən səbəblər:
• Federasiya Nizamnaməsinin, müvafiq Təlimatın rəhbər orqanlar tərəfindən qəbul edilmiş əmr, qərar və göstəriş müddəalarının pozulması və icra edilməməsi;
• Davranış və hərəkətləri ilə Federasiyanın və karatenin imicinə xələl gətirilməsi;
• İdman tədbirləri və yarışlar zamanı ümumi tələb və qaydaların pozulması (idman bazasının daxili qaydalarına əməl edilməməsi, qeyri-etik hərəkətlər, yarış rəhbərlərinin müvafiq göstərişlərindən imtina edilməsi, hakimlərin qərarlarına qarşı hörmətsizlik və kobud hərəkətlərlə reaksiya və digər qayda və hüquq pozulmaları).

Qeyd: Federasiyanın Nizamnamə müddəaları İdarə heyətinin  müvafiq qərar, göstəriş və əmrlər və bu təlimatın tələbləri Federasiya üzvləri tərəfindən icrası məcburi xarakter daşıyır;

16. İnzibati tənbeh və həvəsləndirmə tədbirləri

16.1. Federasiyanın strukturundakı qurumların, üslubların (klub və mərkəzlərin) fəaliyyətlərindən irəli gələrək müxtəlif idman tədbirləri (yarışlar, təlim, seminarlar və digər) zamanı idmançılar, məşqçi müəllim, hakim və digər işçilər tərəfindən baş vermiş hüquq pozğunluqları, ictimai-asayişin, etik normaların, intizam qaydalarının pozulması, Federasiyanın və karate idman növünün imicinə xələl gətirən hallar baş verərsə, Federasiyanın ictimai-siyasi və idman həyatında iştirak etməkdən imtina edilərsə aşağıdakı intizam tənbeh tədbirləri tətbiq edilə bilər:

– xəbərdarlıq (məzəmmət);

– töhmət;

– idmançıların idman tədbirlərində iştirakına müvəqqəti qadağa;

– idmançıların milli yığma, komanda tərkibindən xaric edilməsi;

– hakimlik fəaliyyətinə qadağa;

– məşqçilik fəaliyyətinin ləğv edilməsi;

– Federasiyadan xaric edilmə;

16.2.   Federasiyanın ictimai-idman həyatında və nizamnamə müddəalarından irəli gələn digər fəaliyyət sahələrində aktiv iştirak edən işçilər, yüksək dərəcəli idmançıların hazırlanmasında xidmətləri olan məşqçi-müəllimlər, uzunmüddətli səmərəli fəaliyyətləri olan hakimlər, milli yığma komanda tərkibində beynəlxalq miqyaslı yarışlarda yüksək nəticələr göstərən idmançılar və bu idmançıların hazırlığında zəhməti olan məşqçi müəllim heyəti və Federasiyanın digər üzvlərinə aşağıdakı həvəsləndirmə tədbirləri tətbiq edilə bilər:

• təşəkkür elan edilməsi;
• idmançılara fərdi təqaüdlərin təyin edilməsi;
• pul mükafatları;
• Federasiyanın fəxri fərmanı ilə təltif edilməsi;
• fəxri adların verilməsi, digər dövlət təltifləri və mükafatlandırılmalar üçün təqdimatların verilməsi (vəsadət qaldırılması).

16.3. İnzibati tənbeh tədbirlərinin və həvəsləndirmə tədbirlərinin tətbiq edilməsi Federasiyanın “Hüquq və İntizam” komitəsinə yazılı müraciətlər əsasında həll edilir.

16.4. Müraciətlər komitədə müzakirə edildikdən sonra müvafiq qərarın tətbiq edilməsi üçün komitə tərəfindən İdarə heyətinə təqdimatlar (müraciətlər) verilir.

Qeyd: Yarışlar zamanı baş vermiş neqativ hallara görə inzibati tənbəh tədbirlərinin tətbiq edilməsi yarışların baş hakiminin, üslubların fəaliyyətindən irəli gələn tədbirlərdə  (idman tədbirləri, yarışlar və d.) və ictimai həyatında baş verən etik qaydaların, norma və tələblərin pozulması zamanı isə federasiya rəhbərlərinin Federasiyanın Hüquq və intizam komissiyasına yazılı müraciətlərinə əsasən icra olunur.

19. Yarışın baş hakiminin funksiya və vəzifələri.

• Yarışın baş hakimi müvafiq yarışın hakimlik fəaliyyətinin təşkili və idarəçiliyinə ümumi rəhbərlik vəzifəsini həyata keçirir və aşağıdakı funksiyaları yerinə yetirir:

• yarış öncəsi təşkilatı-təminat tədbirlərini yerinə yetirir;
• mandat komissiyasının üzvlərini təyin və onun içinə rəhbərlik edir;
• mandat komissiyasının nəticələrinə (protokollarla) əsasən “püşkatma” prosesində iştirak etməklə nəzarət edir;
• yarışların reqlament və proqramına əsasən yarışları idarə edən hakimlərlə yarışların keçirilməsilə əlaqədar metodiki tövsiyyə və tapşırıqların verilməsi məqsədilə seminar və müşavirə keçirir;
• hakimlər briqadasını formalaşdırır və onların arasında vəzifə bölgüsü aparır, fəaliyyətini tənzimləməklə rəhbərlik və nəzarət funksiyasını yerinə yetirir;
• idmançıların sayı və çəki dərəcələrini nəzərə alaraq döyüşlərin proqram və reqlamentini baş katib və təşkilat komitəsiylə razılaşdırır;
• hakimlərin fəaliyyətini idarə etməklə tənzimləyir, hakimlər tərəfindən baş vermiş neqativ halların hakimlər tərəfindən ciddi səhvlərə yol verilməsi, hakimlərin qərəzli rəftarının aradan qaldırılması üçün müvafiq qərarlar, nöqsan və səhvlərə yol vermiş hakimlərin kənarlaşdırılması və s. verir;
• döyüşə çıxan idmaçıların ekipirovkasına nəzarət edən idmançının tatamiyə (döyüşə) müşaiət edən hakimlər təyin edir;
• yarışların nəticələri barədə hesabatı tərtib edərək 3 gün müddətində rəhbərliyə (baş katibə) təqdim edir;
• yarış öncəsi yarışı idarə edən hakimlər heyəti ilə keçirilən müşavirədə iştirak edərək tövsiyyə və metodiki göstərişlər verir, yarışların gedişatı və hakimlər briqadalarının fəaliyyətini müşahidə edir;
• yarışlar bitdikdən sonra hakimlər heyətinin fəaliyyətinin qiymətləndirilməsi məqsədilə müşavirə keçirərək analitik müzakirə aparır, baş vermiş müəyyən çatışmazlıq və nöqsanların aradan qaldırılması üçün müvafiq tövsiyyələr (göstəriş) verir;
• yarışların yekunu barədə müvafiq hesabat tərtib edərək Yarışın Təşkilat Komitəsinə təqdim edir;
• yarışlar zamanı baş vermiş neqativ hallar (idmançılar və hakimlər tərəfindən etik norma və davranış qaydalarının və tələblərin) baş verdikdə müvafiq qaydada Federasiyanın Hüquq və intizam komitəsinə müraciətlər hazırlayır;
• idarə heyətinin müvafiq qaydada digər göstəriş və tapşırıqlarını icra edir.

Qeyd: 1. Yarışı idarə edən hakimlər onlar üçün xüsusi ayrılmış yerlərdə olmalı və baş hakimin icazəsi olmadan ayrılmış sahəsini tərk etməsi qadağandır.

2. Ölkə birinciliyi və çempionatlarında idmançılara verilən diplomlar və medallar Nazirlik tərəfindən verilir.
3. Rəsmi Respublika yarışlarının maliyyə xərcləri Federasiya və Nazirlik tərəfindən ödənilir.
4. Zəruri olduğu halda Federasiyanın təşkil etdiyi yarışlarda “İştirakçı haqqı” tətbiq edilə bilər.
5. Yarış barədə hesabat və arayış müzakirə edildikdən sonra keçirilən yarış haqda idarə heyəti tərəfindən müvafiq qərar qəbul edilir.

20. İdmançıların əxlaq və davranış kodeksi.

• Azərbaycan Respublikasının layiqli vətəndaşı olması üçün bacarıq və səy göstərməli, ölkənin atributlarına (gerb, bayraq) ehtiram göstərməli, dövlət himnini bilməli və onlarla bağlı rituallara əməl etməlidir.
• Azərbaycan xalqının əxlaqı, mənəvi dəyərlərinə (böyüyə hörmət, kiçiyə qayğı) hörmətlə yanaşmalı, təbliğ etməli;
• Federasiyanın Nizamnamə və Təlimatlarının tələblərinə-karatenin etiket və rituallarına əməl etməli;
• Təmsil olduğu idman qurumunun adını uca tutmalı, onun imicinə xələl gətirən hərəkətlərdən çəkinməli;
• Öz üzərində çalışmalı, beynəlxalq miqyaslı yarışlarda layiqincə təmsil etməsi üçün bilik və bacarıqlarının yüksəldilməsi üçün səy göstərməli;
• Təmsil olduğu idman kollektivində rəftar və davranışında etik normaları gözləməli;
• İdman yarışlarında təmsil olunduğu idman qurumunun geyim formasında simvol və atributlarına əməl etməklə çıxış etməli;
• Yarışlar zamanı idman təşkilatının daxili tələb və qaydalarına əməl etməli, xidmət personalının əməyini qiymətləndirməli, rəhbər heyətin göstəriş və tapşırıqlarına hörmətlə yanaşmalı;
• Təmsil olunduğu idman qurumları və rəhbər orqanları tanımalı, hörmət və ehtiram göstərməli, məşqçi-müəllimlərin tapşırıqlarına əməl etməklə yüksək əxlaqi keyfiyyətlərə nail olmaq.

21. Yarışlarda iştirak edən məşqçi-müəllimlərin(komanda nümayəndəsi) davranış qaydaları və vəzifələri.

• AKF-nın müvafiq qurumlarında fəaliyyət göstərən məşqçi-müəllimlər Federasiyanın təqvim-planında daxil edilmiş yarışlar haqda məlumatlı olmalı və hər yarışdan öncə idmançıların hazırlığı və yarışlarda iştirakı ilə əlaqədar müvafiq tədbirlər həyata keçirməlidirlər;

• Yarışlardan öncə komanda tərlibini müəyyən edib onlarla hazırlıq, təlim-məşq toplanışlarını keçirir;
• Komandanı yarışa gətirərkən tələb olunan müvafiq sənədləri hazırlamalı, onların tibbi müayinəsini təşkil etməli, idmançıların geyim formasına, ekipirovkası və gigiyenik tələblər və estetik görünüşünə nəzarət etməlidirlər;
• Yarışda iştirak edən komanda üzvləri ilə yarışda, yaşayış yerlərində qayda və tələblərə, nizam-intizam qaydalarına riayət edilməsi barədə profilaktik söhbətlərlə təlimatlandırma keçirməlidir;
• Komandanın nümayəndəsi yarışın proqramına uyğun olaraq Mandat komissiyasına müvafiq, tələb olunan sənədləri(sifarişnamə, şəxsiyyət vəsiqələri və s.) təqdim edir, yarışların proqramı, çəkilmə prossesi və döyüşlərdə idmançıların iştirakını təmin edir;
• İdmançıları püşk cədvəlinə əsasən döyüşə hazırlamalı, vaxtında döşəyə (tatamiyə) çıxmasını təmin etməlidir;
• Yarış zamanı etik qaydaları gözləməli, etirazlarını müəyyən edilmiş qaydada təqdim etməli, hakimlərin qərarına hörmətlə yanaşmalı, yarış rəhbərlərinin tələb göstərişlərinə əməl etməlidir.

Qeyd: Komanda nümayəndəsinin (məşqçinin) çəkilmə prosessini yerinə yetirən hakimlərin, baş hakimlər heyətinin və döyüşü idarə edən hakimlərin fəaliyyətinə təsir və müdaxilə etməsi qəti qadağandır.

22. İdmançıların yarışlarda davranış qaydası.

• Yarışlarda iştirak edən komanda üzvləri (idmançılar) komanda nümayəndəsinin(məşqçilərin) yarışlarda iştirak, davranış və nizam-intizam qaydalarına riayət edilməsi ilə bağlı təlimatları sözsüz icra etməlidirlər.
• Yarışlar keçirilərkən onlara ayrılmış məkanı döyüşlər bitənədək tərk etməməlidirlər.
• Döyüş zamanı rəqibinə hörmətlə yanaşmalı, kobud, etikadankənar hərəkətlərdən çəkinməli, hakimlərin qərarına hörmət və təmkinlə qarşılamalı, rəqibə qarşı qadağan edilmiş zədələnməyə səbəb ola biləcək texnika və fəndlərdən istifadə etməməlidirlər.

23. Şikayət və etirazların verilməsi və həlledilməsi qaydaları.

• Yarışlar keçirilərkən yarışların təşkili və keçirilməsilə bağlı nöqsanlar və hakimlik fəaliyyəti zamanı müxtəlif neqativ hallar(səhvlər) ortaya çıxa bilər və bu zaman komandaların nümayəndələri tərəfindən müvafiq qaydada şikayət və etirazlar yarana bilər.
• Şikayətlər döyüşdən sonra 30 dəq müddətində verilir. (Videoformat mövcuddursa təqdim edilir)
• Etiraz və şikayət yazılı formada yarışın direktoru və baş hakimə təqdim edilir.
• Müvafiq komissiya (yarışın direktoru, baş hakim, hüquq və intizam komitəsinin sədri) tərəfindən şikayətə 30dəq müddətində baxaraq müvafiq qərar qəbul edilir.

Qeyd: Yarışdan(döyüşdən) sonra vaxtında verilməyən protokollaşdırılmayan, video görüntüsü olmayan şikayət qəbul edilmir.