Bugün Azərbaycan Karate Federasiyasının vitse-prezidenti, Əməkdar Bədən Tərbiyəsi və İdman Xadimi, Əməkdar məşqçi, 7-ci dan qara kəmər sahibi, Azərbaycanda karate idman növünün inkişafına böyük tövhələr vermiş və verməkdə olan Rəhman Süleyman oğlu Hətəmovun 50 yaşı tamam olur.

Rəhman Hətəmov 12 yanvar 1975-ci ildə Bakı şəhərində anadan olmuşdur.

10 yaşından karate idman növü ilə məşğul olan Rəhman Hətəmov həm idmançı, həm də məşqçi kimi böyük uğurlara imza atmışdır. İlk məşqçisi doğma qardaşı Əhməd Hətəmov olan Rəhman idmançı kimi karyerasına 1992-ci ildən başlamışdır. 1993-cü ildə karate üzrə gənclər arasında dünya çempionu olmuş və bununla bu yaş kateqoriyasında (18 yaşadək) müstəqil Azərbaycanın idman tarixinə ilk dünya çempionu kimi düşmüşdür.

1997-ci ildə keçirilən Dünya çempionatında həm şəxsi mütləq çəki dərəcəsində, həm də komanda yarışlarında qızıl medal qazanmışdır.

2001-ci ildə Avropa çempionatında həm şəxsi mütləq çəkidə, həm də komanda tərkibində qızıl medal qazanıb. Zədə aldığı üçün 2001-ci ildə 26 yaşında idmançı karyerasını bitirdi.

2007-ci ildə yeniyetmə və gənclərdən ibarət yığma komandanın baş məşqçisi, 2008-ci ildə isə böyüklərdən ibarət yığma komandanın baş məşqçisi olmuşdur.

2015-ci ildə Azərbaycanda keçirilən Birinci Avropa Oyunlarında milli komanda 4 qızıl (Firdovsi Fərzəliyev, Rəfael Ağayev, İrina Zaretska, Ayxan Mamayev) və 2 bürünc medal (İlahə Qasımova, Niyazi Əliyev) qazandı.

2016-cı ildə Fransada keçirilmiş Avropa çempionatında komandanın qalibiyyəti haqqında Rəhman Hətəmov qeyd etmişdir: “Çempionat nəticəsində əldə etdiyimiz nailiyyətlər – 2 qızıl və 1 bürünc medal göstərdi ki, Azərbaycan karatesi Avropada ən güclü karate məktəblərindəndir. Qadınlardan ibarət komandamızın çempion olmağı, kata kimi indiyədək bizim üçün uğursuz olan karate növündə 17 yaşlı Roman Heydərovun bürünc medal qazanması və ümumi hesabda üçüncü yer tutmağımız karatemizin inkişafının göz qabağında olmasından xəbər verir”.

Məşqçilik dövründə dəfələrlə Dünya və Avropa çempionatlarındə qazanılan uğurlar nəticəsində Rəhman Hətəmov fəxri adlarla:
2001-ci ildə Avropa çempionatında göstərdiyi nəticələrə görə — “Əməkdar idman ustası”;
2013-cü ildə İslam Həmrəyliyi Oyunlarında ilk dəfə olaraq yığma komandamız komanda yarışlarının qalibi — “Əməkdar məşqçi”;
2014-cü ildə ilk dəfə yığma komandamız Avropa çempionu — “Əməkdar İdman və Bədən tərbiyəsi xadimi”;
2015-ci ildə Bakıda keçirilən ilk Avropa oyunlarında uğurlu çıxışı zamanı — “Azərbaycan Respublikası Prezidentinin fəxri diplomu” ilə təltif edilib.
Rəhman Hətəmov 2022-ci ildən Azərbaycan Karate Federasiyasının vitse-prezidenti kimi fəaliyyət göstərir.

50 illik yubileyi münasibətilə Azərbaycan Karate Federasiyasının rəhbərliyi, hakim, məşqçi və minlərlə karateçi adından Rəhman müəllimi təbrik edir, ona uzun ömür və cansağlığı arzu edirik.

№ ƏM-033 28 dekabr 2024-cü il

Ə M R

   “AKF-in məşqçisi Rövşən Allahverdiyevə

     intizam-tənbeh tədbirinin tətbiq edilməsi barədə”

Azərbaycan Karate Federasiyasının 2024-cü ilin idman yarışlarının Təqvim-Planına əsasən idman karatesi üzrə noyabr ayında keçirilən ölkə çempionatından sonra 55 kq çəki dərəcəsində yığma komandanın tərkibinin müəyyən edilməsi məqsədi ilə dekabr ayında keçirilməsi nəzərdə tutulan seçim döyüşlərinə 5 nəfərdən 2 idmançı gəlməmiş, 3-cü idmançı Fərid Hacızadənin isə çəkisi artıq olduğuna görə seçim döyüşünə buraxılmamışdır.

Çəki dərəcəsində qalan 2 nəfər Səfərov Əli (FHN) və Şiriyev Elçin (Təhsil) çempionatın finalında görüşdükləri üçün AKF-in baş katibi, baş hakimi və baş məşqiçinin birgə rəyinə əsasən təkrar görüşün keçirilməsi məqsədə uyğun hesab edilməmişdir.

Bu qərarla razılaşmayan məşqçi-müəllim Rövşən Allahverdiyev bu hərəkəti ilə subardinasiya qaydalarını pozaraq, AKF rəhbərliyinə müraciət etmədən birbaşa Gənclər və İdman Nazirliyinə şikayət etməklə yanaşı həmçinin idmançının valideynlərini də şikayət etməyə təhrik etməklə federasiyanın imicinə xələl gətirən, rəhbərliyin qərarlarının obyektivliyini şübhə altına alan, əsassız iddialar olmaqla yanaşı qeyri-etik və xoşagəlməz president yaradır.

Qeyd etmək lazımdır ki, Rövşən Allahveriyevin bu hərəkəti ilk deyil, o zaman-zaman qeyri-adekvat və xoşagəlməz neqativ davranışları ilə fərqlənmişdir.

Sözügedən məsələyə federasiyanın Hüquq və İntizam Komitəsində baxılmış və müvafiq təklif ilə federasiya rəhbərliyinə müraciət edilmişdir.

Yuxarıda göstərilənləri nəzərə alaraq,

əmr edirəm:

1. Məşqçi-müəllim Rövşən Allahverdiyevə AKF-in müvafiq qaydalarını pozduğuna, yol verdiyi nöqsanlara, qeyri-etik və məşqçiliyə yaraşmayan davranış və federasiyanın imicinə xələl gətirən hərəkətlərinə görə “töhmət” elan edilsin.

2. Əmr federasiya tərkibində fəaliyyət göstərən idman qurumlarının idmançı, məşqçi-müəllim heyətinə elan edilsin.

3. Baş katib (Q.Sayadov) və Hüquq və İntizam Komitəsi (H.Məmmədov) tərəfindən R.Allahverdiyevə belə xoşagəlməz hərəkətlərin təkrar ediləcəyi təqdirdə onun barəsində daha sərt intizam tədbirlərinin görüləcəyi barədə ciddi xəbərdarlıq edilsin.

Əsas:  Hüquq və İntizam Komitəsinin təklifi.

Federasiya prezidenti                                   Ülvi Quliyev

AKF -in məşqçisi Rövşən Allahverdiyevə töhmət verilməsi barədə – ƏMR

Dövlət Himninin səsləndirilməsi ilə başlayan tədbirdə ilk olaraq Azərbaycanın ərazi bütövlüyü uğrunda şəhid olmuş qəhrəmanlarımızın xatirəsi bir dəqiqəlik sükutla yad edilib.

Daha sonra çıxış edən AKF-in ənənəvi karate üslubu üzrə rəhbəri, professor Əhməd Əfəndi ölkəmizdə bu cür yarışların keçirilməsinin vacibliyini vurğulayıb. Ümummilli Lider Heydər Əliyevin idmana göstərdiyi misilsiz xidmətlərdən söz açan qurum rəsmisi Prezident İlham Əliyevin də bu siyasəti uğurla davam etdirdiyini diqqətə çatdırıb. O, Azərbaycanın idman ölkəsi olduğunu və bir çox yarışları uğurla təşkil etdiyini söyləyib.

AKF-nin vitse-prezidenti Rəhman Hətəmov da öz növbəsində keçirilən yarışların gənc nəslin təlim-tərbiyəsində vacib rolunun olduğunu qeyd edib. O bildirib ki, Ali Baş Komandan İlham Əliyevin idmanın bütün növlərinin, xüsusilə karatenin ölkəmizdə geniş yayılması və inkişaf etməsinə göstərdiyi diqqət və qayğısı qazanılan uğurların təməlidir.

Yarışın açılış mərasimində bir sıra dövlət xadimləri, idman ictimaiyyətinin tanınmış simaları və media nümayəndələri iştirak etmişdir.

Ölkə birinciliyi və çempionatında 35-dən çox klub və nümayəndəliklərdən 300 yaxın karateçi 48 dəst medal uğrunda öz qüvvəsini sınayıb. Qaliblər Gənclər və İdman Nazirliyinin təsis etdiyi diplom və medallarla mükafatlandırılıblar.

Mükafatçıları diplom və medallarla təltif ediliblər. Mükafatları idmançılara AKF-in vitse-prezidentləri Füzuli Musayev, Rəhman Hətəmov, Allahverdi Rüsrənov, federasiyanın baş katibi Qabil Sayadov, Hüquq və İntizam Komitəsinin sədri Həmid Məmmədov və ənənəvi karate üslubunun rəhbəri Əhməd Əfəndi təqdim ediblər.

İlk üç yeri tutmuş idmançılar ənənəvi karate üslubu üzrə milli komandanın tərkibinə cəlb olunacaq. Onlar 2025-ci ildə keçiriləcək dünya və avropa çempionatlarında ölkəmizi təmsil edəcəklər.

Qeyd edək ki, komanda hesabında medalların sayına görə, Fudokan 1-ci yerə, Qarabağ Karate Klubu 2-ci yerə, FHN – İdman sağlamlıq Mərkəzinin karateçiləri 3-cü yeri qazanıb.

Ənənəvi karate üslubu üzrə ölkə birinciliyi və çempionatının yekun – PROTOKOLLARI

 

Azərbaycan Karate Federasiyasının nəzdində fəaliyyət göstərən full kontakt karate üzrə uşaq, yeniyetmə, gənclər və böyüklər arasında ölkə birinciliyi və çempionatına yekun vurulub.

Karateçilərin paradından sonra Dövlət Himninin səsləndirilməsi ilə başlayan tədbirdə ilk olaraq Azərbaycanın ərazi bütövlüyü uğrunda şəhid olmuş qəhrəmanlarımızın xatirəsi bir dəqiqəlik sükutla yad edilib.

Daha sonra çıxış edən Azərbaycan Karate Federasiyasının vitse-prezidenti Füzuli Musayev ölkədə bu cür yarışların keçirilməsinin vacibliyini vurğulayıb. Ümummilli Lider Heydər Əliyevin idmana göstərdiyi misilsiz xidmətlərdən söz açan qurum rəhbəri Prezident İlham Əliyevin də bu siyasəti uğurla davam etdirdiyini diqqətə çatdırıb. O, Azərbaycanın idman ölkəsi olduğunu və bir çox yarışları uğurla təşkil etdiyini söyləyib.

AKF-in kontakt üslubları üzrə vitse-prezidenti Allahverdi Rüstəmov da öz növbəsində keçirilən yarışların gənc nəslin təlim-tərbiyəsində vacib rolu olduğunu qeyd edib. O bildirib ki, Ali Baş Komandan İlham Əliyevin idmanın bütün növlərinin, xüsusilə karate idman növünün ölkəmizdə geniş yayılması və inkişaf etməsinə göstərdiyi diqqət və qayğısı, qazanılan uğurların təməlidir.

Yarışın açılış və mükafatlandırılma mərasimində AKF-in idman karatesi üzrə vitse-prezidenti Rəhman Hətəmov, baş katib Qabil Sayadov, hüquq və intizam komitəsinin sədri Həmid Məmmədov, texniki və məşqçilər komitəsinin sədri Əhməd Əfəndi və qurumun digər üzvləri bir sıra kateqoriyalar üzrə qalibləri təltif edib.

Qeyd edək ki, ölkə birinciliyi və çempionatında 40-a yaxın klubdan 300-dən çox karateçi öz qüvvəsini sınayıb.

Medal sayına görə Xətai İdman Mərkəzi 1-ci, “KWF AZƏRBAYCAN” 2-ci, “İKO MATSUSHİMA” klubu isə 3-cü yerə layiq görülüb.

Qaliblər Gənclər və İdman Nazirliyinin təsis etdiyi diplom və medallarla mükafatlandırılıblar.

Yekun nəticələr (PROTOKOLLAR)

Azərbaycanda səfərdə olan karate ustası, 9-cu dan qara kəmər sahibi Hitoşi Kasuyanın rəhbərliyi ilə keçirilən XXXII Ümumrespublika seminarının açılış mərasimi keçirilib.

Dövlət Himni səsləndiriləndən sonra Azərbaycanın suverenliyi və torpaqları uğrunda həyatlarını qurban vermiş şəhidlərin xatirəsi bir dəqiqəlik sükutla yad edilib.

Mərasimdə çıxış edən Azəbaycan Karate Federasiyasının (AKF) vitse-prezidenti, 8-ci dan qara kəmər sahibi Füzuli Musayev seminar iştirakçılarını AKF-nin rəhbərliyi və İdarə Heyəti adından salamlayıb, onlara uğurlar arzu edib.

O bildirib ki, təcrübəli məşqçilər və məşhur karateçilərlə yanaşı, gənc idmançıların da iştirak etdiyi

Ümumrespublika seminarının təşkilində əsas məqsəd ölkəmizdə karate üzrə idmançı və məşqçilərin texnika səviyyəsini daha da yüksəltmək, gənclərin sağlam həyat tərzinə marağını artırmaq, onların asudə vaxtının səmərəli təşkilinə kömək etməkdir.

Dünya Şotokan Karate-do Federasiyasının baş təlimatçısı, 9-cu dan qara kəmər sahibi Hitoşi Kasuya karateçilərimizi salamlayaraq, onlara uğurlar arzu edib. Ölkəmizə sayca 25-ci səfərinin olduğunu bildirən H.Kasuya məmnunluğunu ifadə edib. O, seminar müddətində müasir karatedə olan dəyişikliklər, konkret fəndlər üzərində praktik biliklərini nümayiş etdirəcəyini söyləyib.

Daha sonra AKF rəhbərliyi adından H.Kasuyaya Azərbaycanda karatenin inkişafında göstərdiyi əvəzsiz xidmətlərə görə xatirə hədiyyəsi təqdim olunub.

Tədbirdə Gənclər və İdman Nazirliyinin Qeyri-olimpiya növləri üzrə sektor müdiri Fəqan Səfərov, AKF-nin vitse-prezidentləri Füzuli Musayev, Rəhman Hətəmov, Allahverdi Rüstəmov, baş katib Qabil Sayadov, Hüquq və İntizam Komitəsinin sədri Həmdiyyə Məmmədov, Texniki və Məşqçilər Komitəsinin sədri Əhməd Əfəndi, federasiya prezidentinin köməkçisi Vüsal Abdullazadə və digər şəxslər iştirak ediblər.

Qeyd edək ki, XXXII Ümumrespublika texniki seminarına 250-dən çox idmançı və məşqçi qatılıb. Məşhur karate ustası seminarla yanaşı, yerli idmançılardan Dan – qara kəmər imtahanını tədbirin son günündə götürəcək.

Tunisin Monastir şəhərində Kyokuşinkay karate üzrə II qış düşərgəsi və beynəlxalq turnir keçirilib. Hakimlərə və idmançılara peşəkar təlim dərsləri və seminarlar keçmək üçün Azərbaycan Karate Federasiyasının nəzdində fəaliyyət göstərən ənənəvi karate üzrə “KWU-WFKF” birliyinin vitse prezidenti, beynəlxalq dərəcəli hakim Qələndər Aslanov rəsmi dəvət alıb.

İdmançılara peşəkar ustad təlim məşqləri keçmək üçün Qələndər Aslanovla yanaşı, Kyokuşin Dünya Birliyinin (KWU) baş katibi, rusiyalı 5-ci dan Aleksandr Piçkunov da dəvət alıb.

  Gündəlik peşəkar təlimlər əvvəlcədən planlaşdırılmış proqram üzrə qruplara uyğun təşkil edilib. Eləcə də həmin günün proqramına uyğun olaraq hakimlik seminarları başlayıb. Seminarları KWU Hakimlər Kollegiyasının üzvü, dəfələrlə Avropa və dünya çempionatlarında “Ən yaxşı hakim” seçilən təmsilçimiz Qələndər Aslanov və KWU-nun baş katibi Aleksandr Piçkunov idarə edib. 19 ölkədən (Tunis, Əlcəzair, Liviya, Qvineya, Mərakeş, Konqo, Polşa, İngiltərə, Rusiya, Nambiya, İraq, Səudiyyə Ərəbistanı, Zambiya, Misir, Mali, Nigeria, Kongo və digər ölkələr) 150-dən çox hakimin iştirak etdiyi seminar ilk olaraq test həll etməklə başlanıb. Testlərlə bağlı suallar bitdikdən sonra təcrübə məşğələləri keçirilməsi üçün hakimlər qruplara bölünüb. Hakimlərin sayı gözlənildiyindən daha çox olduğu üçün seminarlar 2 gün ərzində 8 saat davam edib.

Monastir şəhərinin 3 km məsafəsində yerləşən Aralıq dənizinin sahilində Marina Golf mərkəzində dövlət nümayəndələrinin iştirakı ilə böyük (1760 iştirakçı) festival təşkil olunub. Tədbir Tunisin Dövlət Himninin səsləndirilməsi ilə başlayıb. Sonra ustad dərslərinin keçirilməsi üçün idmançılar dərəcəyə görə qruplara bölünüb. Rusiyalı karate ustası ilə eyni meydanı bölən təmsilçimiz təlim məşqlərini bitirdikdən sonra turnirin təşkilati işlərinə yaxından dəstək verib.

Yarışı idarə edən hakimlərin doğru verilməyən qərarları və digər qayda pozuntuları yerindəcə təmsilçimiz tərəfindən izah edilib, mübahisəli məsələlər aradan qaldırılıb və heç bir idmançının hakim ədalətsizliyi ilə üzləşməsinə imkan verilməyib.

Sonra dövlət nümayəndələri ilə təmsilçimiz arasında rəsmi görüş baş olub. Tunis və Azərbaycan arasında dostluq münasibətlərinin qurulması, həmçinin gələcəkdə idman yarışları təşkil etmək istiqamətində danışıqlar aparılıb.

 Sonda təmsilçimiz Qələndər Aslanova Tunisin Kyokuşinkay Karate və Döyüş Sənəti Federasiyasının prezidenti tərəfindən beynəlxalq peşəkar təlimlər, hakimlərə keçirilən seminarlar və çempionata verdiyi töhfəyə görə xüsusi hazırlanmış hədiyyələr təltif olunub.