Fullkontakt və şinkyokuşin karate üslubu üzrə 27-ci ölkə birinciliyi və çempionatı keçirilib

Dekabrın 27-də Sərhədçi İdman Mərkəzində Azərbaycan Karate Federasiyasının təşkilatçılığı ilə fullkontakt və şinkyokuşin karate üslubu üzrə 27-ci ölkə birinciliyi və çempionatı keçirilib.
Tədbirin açılış mərasimində Gənclər və İdman naziri Fərid Qayıbov, Azərbaycan Karate Federasiyasının prezidenti, Milli Məclisin deputatı Ülvi Quliyev, Milli Məclisin deputatları, federasiya rəsmiləri, tanınmış idmançılar, idman ictimaiyyətinin nümayəndələri və digər qonaqlar iştirak ediblər.
Açılış mərasimində çıxış edən Gənclər və İdman naziri Fərid Qayıbov ölkəmizdə idmanın inkişafının dövlət siyasətinin prioritet istiqamətlərindən biri olduğunu qeyd edib, belə mötəbər yarışların keçirilməsinin idmançıların peşəkar səviyyəsinin yüksəldilməsinə və gənclərin idmana cəlb olunmasına mühüm töhfə verdiyini vurğulayıb.

Azərbaycan Karate Federasiyasının prezidenti Ülvi Quliyev isə çıxışında bildirib ki, Azərbaycanda idmanın sistemli və davamlı inkişafı Azərbaycan Respublikasının Prezidenti, Müzəffər Ali Baş Komandan cənab İlham Əliyevin xüsusi diqqət və qayğısı sayəsində mümkün olub. Qeyd olunub ki, dövlət başçısının idmana göstərdiyi dəstək nəticəsində ölkədə müasir idman infrastrukturu formalaşdırılıb, regionlarda yeni idman obyektləri istifadəyə verilib, idmançıların sosial müdafiəsi gücləndirilib.
Ülvi Quliyev vurğulayıb ki, Prezident İlham Əliyevin idmançılara, o cümlədən karateçilərə göstərdiyi diqqət onların beynəlxalq arenada yüksək nəticələr əldə etməsinə stimul yaradır. Bu qayğı və dəstək sayəsində Azərbaycan karateçiləri dünya və Avropa çempionatlarında ölkəmizi uğurla təmsil edir, dövlət bayrağımızı yüksəklərə qaldırırlar. O, həmçinin qeyd edib ki, Prezidentin idman sahəsinə dair imzaladığı sərəncamlar və qəbul edilən dövlət proqramları gənclərin sağlam ruhda böyüməsində və vətənpərvərlik tərbiyəsində mühüm rol oynayır.
Federasiya prezidenti çıxışının sonunda Prezident İlham Əliyevə və Birinci vitse-prezident Mehriban Əliyevaya idmana göstərilən davamlı diqqət və qayğıya görə karate ictimaiyyəti adından dərin təşəkkürünü bildirib, Gənclər və İdman Nazirliyinin federasiya ilə sıx əməkdaşlığını xüsusi qeyd edib.

Çempionatda ümumilikdə 234 karateçi mübarizə aparıb. Yarışın qalibləri və mükafatçıları Gənclər və İdman Nazirliyi tərəfindən təsis edilmiş diplom və medallarla təltif olunublar.