Karate üzrə ölkə çempionatı və birinciliyi başa çatıb

Dekabrın 18–21-də Gənclər və İdman Nazirliyinin dəstəyi, Azərbaycan Karate Federasiyasının (AKF) rəhbərliyi və təşkilatçılığı ilə karate üzrə ölkə çempionatı və birinciliyi keçirilib.
Yarışlar dörd gün ərzində müxtəlif karate üslubları üzrə təşkil olunub. Çempionatın ilk günü – dekabrın 18-də idman karatesi (WKF) üzrə qarşılaşmalar baş tutub. Dekabrın 19-da kyokuşin karate üslubları üzrə yarışlara start verilib, eyni zamanda çempionatın rəsmi açılış mərasimi keçirilib.
Açılış mərasimində Gənclər və İdman naziri Fərid Qayıbov, Azərbaycan Karate Federasiyasının prezidenti, millət vəkili Ülvi Quliyev, federasiyanın vitse-prezidentləri, rəsmi şəxslər, məşqçilər və idman ictimaiyyətinin nümayəndələri iştirak ediblər.
Yarışların üçüncü günü – dekabrın 20-də ənənəvi karate, fudokan və şito-ryu üslubları üzrə ölkə birinciliyi və çempionatı keçirilib. Bu üslublar üzrə keçirilən qarşılaşmalar gərgin və maraqlı idman mübarizəsi ilə yadda qalıb. Dekabrın 21-də isə çempionatın son günü çərçivəsində koşiki və aşihara karate üslubları üzrə qarşılaşmalar təşkil olunub.
Yarışlar Balaxanı Olimpiya İdman Kompleksində keçirilib. Çempionatda paytaxt Bakı ilə yanaşı Sumqayıt, Abşeron və ölkənin müxtəlif bölgələrini təmsil edən, ümumilikdə 1000-ə yaxın karateçi müxtəlif yaş qrupları və çəki dərəcələri üzrə mübarizə aparıb. Koşiki və aşihara karate üslubları üzrə yarışlarda isə 300-ə yaxın idmançı iştirak edib.
Yüksək təşkilatçılıq səviyyəsində baş tutan birincilik və çempionat Azərbaycan karate məktəbinin inkişaf səviyyəsini bir daha nümayiş etdirib. Yarışların əsas məqsədi karate idman növlərinin respublika üzrə kütləviliyinin artırılması, perspektivli idmançıların üzə çıxarılması, eləcə də Azərbaycan Karate Federasiyasının 2026-cı il mövsümü üçün milli komandalarının və ehtiyat heyətinin formalaşdırılması olub.
Çempionatın yekununda qalib və mükafatçılar Gənclər və İdman Nazirliyi tərəfindən təsis olunmuş diplom və medallarla təltif ediliblər. Birinci yerləri tutan idmançılar, həmçinin qarşıdan gələn dünya və Avropa çempionatlarında Azərbaycanı təmsil etmək hüququ qazanıblar.
Qeyd edək ki, karate üzrə ölkə çempionatı və birinciliyinin mütəmadi keçirilməsi bu idman növünə marağın artmasına, sağlam həyat tərzinin təşviqinə və gənclərin idmana daha geniş şəkildə cəlb olunmasına mühüm töhfə verir.