Azərbaycan Karate Federasiyasında rəqəmsal transformasiya və müasir idarəetmə modelinin tətbiqi

Azərbaycan Karate Federasiyası müasir idarəetmə prinsiplərinə uyğun olaraq fəaliyyətini ardıcıl şəkildə təkmilləşdirir, idman sahəsində rəqəmsal transformasiyanın genişləndirilməsi istiqamətində məqsədyönlü addımlar atır. Federasiyanın əsas prioritetlərindən biri təhlükəsiz, şəffaf və operativ xidmət modelinin formalaşdırılması, məşqçi–idmançı–hakim sisteminin vahid elektron mühitdə idarə edilməsidir.

Bu məqsədlə Azərbaycan Karate Federasiyasında müasir texnologiyalar əsasında qurulmuş tam elektron məlumat bazası tətbiq edilir. Elektron platforma məşqçilərin, idmançıların və hakimlərin məlumatlarının mərkəzləşdirilmiş qaydada toplanmasına, statusların dəqiq uçotuna, lisenziyaların elektron formada izlənilməsinə və idarə olunmasına imkan yaradır. Yeni sistem idarəetmə proseslərinin sürətini artırmaqla yanaşı, məlumatların mühafizəsi və təhlükəsizliyinin təmin edilməsi baxımından da müasir tələblərə cavab verir.

Federasiyanın fəaliyyətində kağız daşıyıcıların istifadəsinin azaldılması, “daşınan sənədlər” praktikasından imtina olunması, sənədlərin elektron dövriyyəyə keçirilməsi xüsusi əhəmiyyət daşıyır. Elektron sənəd dövriyyəsi vasitəsilə sənədlərin hazırlanması, qeydiyyatı, təsdiqi, icra nəzarəti və arxivləşdirilməsi prosesi sistemli şəkildə təşkil olunur. QR-kod və rəqəmsal doğrulama mexanizmləri sənədlərin etibarlılığını artırır, prosedurların şəffaflığını və izlənəbilənliyini təmin edir.

Eyni zamanda, yarışların təşkili və idarə olunması proseslərində də yenilikçi yanaşmalar tətbiq edilir. Onlayn qeydiyyat, elektron akkreditasiya, operativ məlumatlandırma və nəticələrin rəqəmsal paylaşılması idman ictimaiyyətinə daha rahat və çevik xidmət göstərilməsinə şərait yaradır. Bu yanaşma idmançıların hazırlıq və iştirak proseslərini sadələşdirir, təşkilati işlərin keyfiyyətini yüksəldir.

Azərbaycan Karate Federasiyası həyata keçirdiyi innovativ layihələr vasitəsilə idman idarəçiliyində müasir standartların tətbiqini genişləndirir, rəqəmsal həllərlə xidmət keyfiyyətini artırır və karate ictimaiyyətinə daha şəffaf, təhlükəsiz, səmərəli xidmət modelinin formalaşdırılmasına töhfə verir.

Vüsal Abdullazadə
Azərbaycan Karate Federasiyası prezidentinin köməkçisi,
Mətbuat və Texniki Təminat Xidmətlərinin rəhbəri