2025-ci ilin yekunlarına həsr olunmuş Azərbaycan Karate Federasiyasının hesabat tədbiri keçirilib

2025-ci il Azərbaycan idmanı, o cümlədən karate ailəsi üçün mühüm nailiyyətlərlə yadda qalmışdır. Bu dövr ərzində ölkəmizdə idmanın inkişafı dövlət siyasətinin prioritet istiqamətlərindən biri kimi ardıcıl və məqsədyönlü şəkildə davam etdirilmiş, əldə olunan nəticələr Azərbaycan idmanının beynəlxalq nüfuzunu daha da möhkəmləndirmişdir.

Azərbaycan Karate Federasiyasının ilin yekunlarına həsr olunmuş hesabat tədbirində çıxış edən federasiya prezidenti Ülvi Quliyev bildirmişdir ki, ötən il ərzində idman karatesi (WKF), ənənəvi karate və kontakt karate istiqamətləri; Kyokuşin (Kay) Senşi, Fullkontakt / Şinkyokuşin karate, Aşihara karate, Fudokan karate, Şotokan karate, Qocyu-Ryu, Vado-Ryu, Şito-Ryu, Koşıki və Kudo üslubları üzrə keçirilən dünya və Avropa çempionatlarında, beynəlxalq turnirlərdə və nüfuzlu çoxnövlü idman yarışlarında Azərbaycan karateçiləri ümumilikdə 209 medal qazanmışlar. Bu nəticələr 76 qızıl, 46 gümüş və 82 bürünc medalla ifadə olunmuşdur.

Qeyd edilmişdir ki, qazanılan medalların böyük bir hissəsi Beynəlxalq Olimpiya Komitəsi tərəfindən tanınan və olimpiya xətti üzrə keçirilən Dünya Karate Federasiyasının yarışlarının payına düşür. Milli komandalarımız III MDB Oyunlarında, İslam Həmrəyliyi Oyunlarında və digər mötəbər beynəlxalq turnirlərdə ölkəmizi layiqincə təmsil etmiş, Azərbaycan bayrağını beynəlxalq arenalarda yüksəklərə qaldırmışdır.

Ülvi Quliyev 2025 -ci ildə Azərbaycanda keçirilən III MDB Oyunlarının yüksək təşkilati səviyyədə baş tutduğunu vurğulamış, açılış və bağlanış mərasimlərinin dünya standartlarına uyğun şəkildə keçirildiyini qeyd etmişdir. Karateçilərimizin həm bu mötəbər yarışda, həm də İslam Həmrəyliyi Oyunlarında göstərdikləri nəticələr ötən ilin Azərbaycan karate idmanı üçün uğurlu dövr kimi dəyərləndirilməsinə əsas vermişdir.

Tədbirdə dövlətin idmana göstərdiyi daim diqqət və qayğı xüsusi qeyd edilmiş, əldə olunan uğurların təməlində Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən ardıcıl idman siyasətinin dayandığı vurğulanmışdır. Bakının 2026 -cı il üçün dünyanın idman paytaxtı seçilməsi ölkəmizin beynəlxalq idman nüfuzunun artmasının bariz göstəricisi kimi qiymətləndirilmişdir.

Hesabat tədbiri zamanı 2025 -ci il ərzində yüksək idman nəticələri ilə fərqlənmiş milli komanda üzvləri, onların hazırlığında xüsusi əməyi olan məşqçilər, peşəkar fəaliyyəti ilə seçilən hakimlər, il ərzində uğurlu çıxışları ilə fərqlənmiş idman klubları, eləcə də karate idmanının təbliği və ictimaiyyətə çatdırılmasında mühüm rol oynayan media qurumları Azərbaycan Karate Federasiyasının mükafat və diplomları ilə təltif olunmuşlar.

Medianın idmanın inkişafında, idmançıların uğurlarının geniş ictimaiyyətə çatdırılmasında və gənc nəslin idmana cəlb olunmasında əvəzsiz rolu xüsusi vurğulanmış, bu sahədə göstərilən peşəkar fəaliyyət yüksək qiymətləndirilmişdir.

Tədbirdə, eyni zamanda, Azərbaycan karate ailəsinin qarşıdakı dövrdə də dövlətin dəstəyi ilə beynəlxalq arenalarda uğurla çıxış edəcəyi, ölkəmizin idman şöhrətinin daha da yüksəldilməsi istiqamətində ardıcıl və məqsədyönlü fəaliyyətin davam etdiriləcəyi qeyd olunmuşdur.

Hesabat tədbirindən əvvəl Azərbaycan Karate Federasiyasının İdarə Heyətinin iclası keçirilmişdir. İclasda üslub rəhbərləri, federasiyanın müvafiq komitələri, eləcə də AKF-in Mətbuat və Texniki Xidməti tərəfindən 2025-ci il üzrə görülmüş işlərə dair hesabatlar təqdim olunmuş, struktur bölmələrinin fəaliyyəti və qarşıdakı dövr üçün əsas prioritet istiqamətlər müzakirə edilmişdir.
Eyni zamanda tədbir çərçivəsində Azərbaycan Karate Federasiyasının yenilənmiş rəsmi rəqəmsal platforması təqdim edilmişdir. Sıfırdan qurulmuş, tam inteqrə olunmuş və beynəlxalq standartlara uyğunlaşdırılmış bu elektron sistem federasiyanın bütün strukturlarını, rəhbərlik, idarə heyəti, məşqçilər, idmançılar, hakimlər, klublar və yarış təşkilatçılarını vahid elektron məkanda birləşdirən kompleks bir ekosistemdir.

Elektron lisenziyalaşdırma, QR -kodlu rəqəmsal şəhadətnamələr, “verify” yoxlama mexanizmi, şəxsi kabinetlər, elektron sənəd dövriyyəsi, “SmartArena” yarış platforması və mərkəzləşdirilmiş məlumat bazası bu ekosistemin əsas sütunlarını təşkil edir. Qeyd olunmuşdur ki, yaradılmış proqram təminatı Azərbaycan Karate Federasiyasının yalnız idman sahəsində deyil, eyni zamanda rəqəmsal idarəetmə və texnoloji inkişaf istiqamətində də öz milli potensialına güvənən, müstəqil və dayanıqlı bir inkişaf modeli formalaşdırdığını nümayiş etdirir.