XI “ARPACHAY OPEN” beynəlxalq karate turniri başa çatıb

Sərhədçi İdman Mərkəzində şəhidlərimizin əziz xatirəsinə həsr olunmuş XI “ARPACHAY OPEN” beynəlxalq karate turniri uğurla başa çatıb.

Azərbaycan Respublikası Gənclər və İdman Nazirliyinin və Azərbaycan Karate Federasiyasının dəstəyi, Arpaçay İdman Birliyinin təşkilatçılığı ilə keçirilən yarışlar 30-31 yanvar tarixlərində beynəlxalq, 1 fevral tarixində isə uşaqlar arasında ölkədaxili turnir formatında reallaşıb.

Turnirin açılış mərasimində şəhid ailələri və qazilər, Azərbaycan Karate Federasiyasının rəhbərliyi, Milli Məclisin deputatları, o cümlədən parlamentin Gənclər və İdman Komitəsinin üzvləri, idman ictimaiyyətinin tanınmış nümayəndələri, eləcə də yarış üçün ölkəmizə təşrif buyurmuş 12 ölkənin idmançı və rəsmi nümayəndələri iştirak ediblər. Tədbir Dövlət Himni və şəhidlərimizin xatirəsinin bir dəqiqəlik sükutla yad edilməsi ilə başlayıb.

Açılış mərasimində Azərbaycan Karate Federasiyasının prezidenti, Milli Məclisin deputatı Ülvi Quliyev çıxış edərək şəhidlərin əziz xatirəsinin yad olunduğunu, ölkədə idman siyasətinin inkişafını və karate idman növünün güclənməsində göstərilən davamlı səyləri vurğulayıb. O qeyd edib ki, XI “ARPACHAY OPEN” beynəlxalq turniri hər il həm peşəkar idmançılar, həm də gənc nəslin inkişafı üçün böyük əhəmiyyət daşıyır və Azərbaycan idmanının beynəlxalq nüfuzunu artırır.

Milli Məclisin Gənclər və İdman Komitəsinin sədri Şahin İsmayılov çıxışında bu cür beynəlxalq yarışların gənclərin idmana marağının artırılmasında, sağlam həyat tərzinin təşviqində və ölkəmizin beynəlxalq idman imicinin gücləndirilməsində mühüm rol oynadığını xüsusi vurğulayıb.

Beynəlxalq turnirdə 12 ölkədən 1200-ə yaxın idmançı müxtəlif yaş və çəki dərəcələri üzrə mübarizə aparıb. Yarışlar yüksək səviyyəli təşkilatçılıqla, maraqlı və gərgin qarşılaşmalar şəraitində keçib. 1 fevral tarixində keçirilən uşaqlar arasında ölkədaxili turnir isə gənc idmançıların bacarıqlarının üzə çıxarılması və onların gələcək inkişafı baxımından əhəmiyyətli olub.

Turnirin təşkilatçısı, Arpaçay Karate Klubunun direktoru, Əməkdar məşqçi Yavər Hüseynov çıxışında Arpaçay İdman Birliyinin prezidenti Əli Əsgərovun adından Azərbaycan Respublikası Gənclər və İdman Nazirliyinə və Azərbaycan Karate Federasiyasına göstərilən dəstəyə görə təşəkkürünü bildirib. O, turnirin yüksək səviyyədə təşkil olunduğunu, iştirakçıların peşəkarlıq və əzmkar mübarizə ruhunu nümayiş etdirdiyini vurğulayıb.

Turnir boyunca fərqlənən idmançılar mükafatlandırılıb, dünya şöhrətli karateçilər Rəfael Ağayev və İrina Zaretska xüsusi fəxri mükafatlarla təltif olunublar. Həmçinin bütün kateqoriyalar üzrə qaliblər medal, diplom və hədiyyələrlə təltif olunublar.

Ümumilikdə XI “ARPACHAY OPEN” beynəlxalq karate turniri ölkəmizdə karate idman növünün inkişafına, gənc nəslin sağlam həyat tərzinə təşviqinə və Azərbaycanın beynəlxalq idman nüfuzunun yüksəldilməsinə xidmət edib. Turnir həm peşəkar idmançılar, həm də gənc nəsil üçün böyük təcrübə və motivasiya mənbəyi olub.