Kyokuşin karate üzrə milli komanda Varnada mübarizə aparacaq

Azərbaycanın Kyokuşin (kay) Senşi karate üzrə milli komandası Varna şəhərində keçiriləcək beynəlxalq yarışlarda iştirak edəcək

Azərbaycan Karate Federasiyasının Kyokuşin (kay) Senşi karate üslubu üzrə milli komandası iyulun 7-11-də Bolqarıstanın Varna şəhərində təşkil olunacaq beynəlxalq karate yarışlarında iştirak edəcək.

Milli komanda Azərbaycan Karate Federasiyasının baş katibi Qabil Sayadovun rəhbərliyi altında 13 nəfərlik nümayəndə heyəti ilə (nümayəndə, məşqçilər və idmançılar) ölkəmizi təmsil edəcək.

Yarış proqramına əsasən, iyulun 7-də “World Cup Varna” Kyokuşin (KAI) karate üslubu üzrə Dünya Kuboku keçiriləcək. İyulun 8-10-da SENŞİ Həvəskar Liqasının yarışları, iyulun 11-də isə SENŞİ Peşəkar Qala Gecəsi təşkil olunacaq.

Azərbaycan təmsilçiləri sözügedən yarışlarda yüksək nəticələr uğrunda mübarizə aparacaq, həmçinin ölkəmizin beynəlxalq idman nüfuzunun möhkəmləndirilməsi və Kyokuşin karate üzrə beynəlxalq əməkdaşlığın genişləndirilməsinə töhfə verməyə çalışacaqlar.

Qeyd edək ki, Varna şəhərində keçiriləcək yarışlar müxtəlif ölkələrdən güclü karateçiləri bir araya gətirərək Kyokuşin (kay) və SENŞİ karate üslubları üzrə ilin mühüm beynəlxalq idman tədbirlərindən biri hesab olunur.