Ənənəvi karate üslubu şito-ryu üzrə turnir yekunlaşıb -FOTO

Azərbaycan Karate Federasiyasının rəhbərliyi ilə Saatlı Olimpiya İdman Kompleksində ənənəvi karate üslubu şito-ryu üzrə turnir keçirilib.

Açılış mərasimi apelin 21-də Azərbaycanın Dövlət himnin səsləndirilməsi ilə başlayan turnirdə şəhidlərin xatirəsi bir dəqiqəlik sükutla yad edilib.

Tədbirdə Mil-Muğan Regional Gənclər və İdman İdarəsinin əməkdaşları, Azərbaycan Karate Federasiyasının prezidentinin köməkçisi Vüsal Abdullazadə, "Şito-Ryu Karate-do İdman Növünün Təbliği" İB prezidenti Bahadur Əhmədov, Vətən müharibəsi şəhidlərinin valideynləri, qazilər eləcə də rayon ictimaiyyətinin nümayəndələri iştirak ediblər.

AKF prezidentinin köməkçisi Vüsal Abdullazadə çıxışında federasiya prezidenti cənab Ülvi Quliyevin və AKF -nın idarə heyəti adından qonaqları və turnir iştirakçılarını salamlayıb.
O çıxışında bildirib ki, Prezident, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində qüdrətli Azərbaycan Ordusunun qazandığı Şanlı Qələbədən, şəhid ailələrinə, qazilərə göstərilən yüksək dövlət qayğısından söz açaraq bildirib ki,  yeniyetmə və gənclərin Vətənə layiq vətəndaş kimi yetişməsində, onlarda torpağa sədaqət və vətənpərvərlik ruhunun aşılanmasında Şəhidlərimizin xatirəsinə həsr olunmuş idman və bu kimi digər tədbirlərin təşkil olunması çox vacibdir.

Turnirdə paytaxt Bakı daxil olmaqla, Sumqayıt, Abşeron, Ağstafa, Sabirabad, Şəki, Kürdəmir, Saatlı və digər rayon klublarından 150-ə yaxın uşaq, yeniyetmə, gənc idmançılar öz qüvvəsini sınayıb.

Komanda hesabında, qızıl medalların sayına görə Ağstafa Fudokan Mərkəzi 1-ci yerə, Şito-Ryu komandası 2-ci yerə, "Fighter" komandası 3-cü yerə layiq görülüb.

Olduqca maraqlı və gərgin idman mübarizəsi şəraitində keçən birincilikdə yüksək yerləri tutmuş idmançılar Azərbaycan Karate Federasiyası tərəfindən təsis edilmiş müvafiq medal və diplomlarla təltif olunublar.