Naxçıvanda karateçilər üçün seminar və imtahan təşkil olunub

Azərbaycan Karate Federasiyası (AKF), Naxçıvan Muxtar Respublikası Gənclər və İdman Nazirliyi və “Qapıcıq” Karate-do İdman Klubunun birgə təşkilatçılığı ilə, muxtar respublikada fəaliyyət göstərən məşqçi və idmançıların ustalıq səviyyəsinin yoxlanılması və yeni təcrübələrin aşılanmasına xidmət edən iki günlük tədbir keçirilib. Bu məqsədlə AKF-in baş katibi Qabil Sayadov, Məşqçilər Komitəsinin sədri Əhməd Əfəndi Naxçıvanda olub. Federasiya rəsmilərinin iştirakı ilə İlham Əliyev adına Olimpiya İdman Kompleksində texniki-taktiki seminar və kəmər imtahanı təşkil olunub.
Məşqçilər üçün keçirilən seminarda karatenin baza texnikaları barədə ətraflı məlumat verilib, iştirakçıları maraqlandıran məsələlər ətrafında fikirlər dinlənilib.
Kəmər imtahanında muxtar respublikanın müxtəlif şəhər və rayonlarından ümumilikdə 130 karateçi iştirak edib. İdmançıların kihon, kata və kumite qaydalarında bacarıqları qiymətləndirilib və onlardan 103-ü müvafiq kəməri təsdiq edən diplomlarla təltif edilib.