Quliyev Ülvi Zahid oğlu 17 sentyabr 1966-cı ildə Bakı şəhərində anadan olmuşdur.

Azərbaycan Dövlət Tibb İnstitutunun Əczaçılıq fakültəsini və Bakı Dövlət Universitetinin Hüquq fakültəsini bitirmişdir.

Əmək fəaliyyətinə 1988-ci ildən başlamış, müxtəlif illərdə aptekdə provizor, baş provizor və aptek müdiri vəzifələrində çalışmışdır. 2002-ci ildən Azərbaycan Respublikası Dövlət Gömrük Komitəsində şöbə rəisi, 2005-ci ildə isə “Gömrükçü” İdman-Sağlamlıq Mərkəzi baş direktorunun müavini olmuşdur.

Karate idman növü üzrə Avropa və dünya çempionu, VIII Dan qara kəmər sahibidir.

Azərbaycan Respublikasının “Əməkdar idman ustası”, “Əməkdar məşqçi” fəxri adlarına layiq görülmüş, Azərbaycan Respublikası Prezidentinin 5 mart 2008-ci il tarixli Sərəncamı ilə “Əməkdar bədən tərbiyəsi və idman xadimi” fəxri adına layiq görülmüşdür.

1992–1997-ci illərdə Azərbaycan Karate-do Federasiyasının, 1997–2023-cü illərdə Azərbaycan Karate-do Federasiyaları Assosiasiyasının (AKFA) prezidenti olmuş, 2023-cü ildən AKFA-nın hüquqi varisi olan Azərbaycan Karate Federasiyasının prezidentidir. Dünya Karate Federasiyasının (WKF) üzvüdür.

Azərbaycan Respublikası Milli Məclisinin III, IV, V, VI və VII çağırış deputatı seçilmişdir. 2018–2020-ci illərdə Milli Məclisin Gənclər və idman komitəsinin sədri olmuşdur.

Milli Məclisin Səhiyyə komitəsinin və Gənclər və idman komitəsinin üzvüdür.

Rus və ingilis dillərini bilir. Evlidir, iki övladı var.