Karate Dünya Karate Federasiyası (World Karate Federation – WKF) tərəfindən idarə olunan, Beynəlxalq Olimpiya Komitəsi (IOC) tərəfindən tanınmış və 2020-ci il Tokio Olimpiya Oyunlarının proqramına daxil edilmiş rəsmi idman növüdür. Bununla da karate tarixində ilk dəfə olaraq Olimpiya Oyunlarında təmsil olunmuş və dünya idman ailəsində öz mövqeyini daha da möhkəmləndirmişdir.
Hazırda WKF dünyanın 5 qitəsində 203 ölkənin milli federasiyasını birləşdirən, milyonlarla idmançını, məşqçini və hakimləri əhatə edən ən nüfuzlu beynəlxalq karate təşkilatıdır. Federasiya beynəlxalq idman qaydalarının vahid sistem üzrə tətbiqini təmin edir, dünya və qitə çempionatlarını, Premyer Liqa turnirlərini, gənclər və yeniyetmələr üzrə dünya birinciliklərini, eləcə də beynəlxalq hakim və məşqçi hazırlığı proqramlarını həyata keçirir.
WKF karate sistemi yalnız Olimpiya Oyunları ilə məhdudlaşmır. Karate Avropa Oyunları, Dünya Oyunları (The World Games), İslam Həmrəyliyi Oyunları, habelə digər regional və kontinental çoxnövlü yarışların da rəsmi proqramına daxildir. Bu yarışlarda karate kata və kumite növləri üzrə ən yüksək idman standartlarına uyğun təmsil olunur.
Azərbaycan Respublikasında karate WKF sistemi üzrə inkişaf etdirilən prioritet idman növlərindən biridir. Ölkəmizdə 150-dən artıq məşqçi-müəllim minlərlə yeniyetmə və gəncin fiziki hazırlığı və vətənpərvərlik ruhunda tərbiyəsi ilə məşğul olur.
Azərbaycanda WKF üzrə rəsmi nümayəndə, əməkdar idman xadimi, 8-ci dan qara kəmər ustası Ülvi Quliyevdir. O, ölkəmizdə karate idman növünün beynəlxalq standartlara uyğun inkişafında və milli kadr potensialının formalaşdırılmasında mühüm xidmətlər göstərmişdir.
