Şito-ryu karate üslubu
(International Shito-Ryu Federation)
Şito-ryu karate üslubu Yaponiyanın klassik karate məktəblərindən biri olmaqla, zəngin texniki irsi, çoxsaylı kata sistemi və dəqiq kumite metodikası ilə seçilir. Bu üslub sürət, çeviklik, balans və texniki müxtəlifliyi özündə birləşdirərək, idmançının hərtərəfli inkişafını təmin edən mükəmməl bir karate məktəbi kimi tanınır.
International Shito-Ryu Federation xətti ilə Şito-ryu karate üzrə beynəlxalq arenada dünya və Avropa çempionatları, iri miqyaslı turnirlər, seminarlar və metodiki toplantılar mütəmadi olaraq təşkil olunur. Hazırda bu üslub dünyanın 67 ölkəsində rəsmi nümayəndəliklər vasitəsilə təmsil olunur və qlobal miqyasda inkişaf etdirilir.
Azərbaycan Respublikasında Şito-ryu karate üslubu da klassik karate məktəbləri sırasında yer alır. Hazırda ölkəmizdə bu fənn üzrə 6 məşqçi-müəllim fəaliyyət göstərir və gənc idmançıların texniki, fiziki və mənəvi hazırlığının yüksəldilməsində mühüm rol oynayırlar.
Azərbaycanda Şito-ryu karate üslubunun rəsmi nümayəndəsi əməkdar məşqçi, 6-cı dan qara kəmər ustası Bahadur Əhmədovdur. O, bu məktəbin ölkəmizdə inkişafı, beynəlxalq əlaqələrin genişləndirilməsi və milli kadr potensialının formalaşdırılması istiqamətində uzun illər ərzində ardıcıl fəaliyyət göstərmişdir.
