Şorinciryu Kenkokan Karate-do Koşiki karate üslubu
(Shorinjiryu Kenkokan Karate-do Koshiki Karate Federation)
Şorinciryu Kenkokan Karate-do Koşiki karate üslubu klassik Okinava və Yapon karate ənənələrinə əsaslanan, müasir qoruyucu avadanlıqlarla real döyüş texnikasının vəhdətini təmin edən beynəlxalq idman istiqamətlərindən biridir. Bu üslub texniki dəqiqliyi, təhlükəsizliyi və yüksək döyüş mədəniyyətini özündə birləşdirərək idmançıların həm fiziki, həm də mənəvi hazırlığının yüksəldilməsinə xidmət edir.
Beynəlxalq arenada Shorinjiryu Kenkokan Karate-do Koshiki Karate Federation xətti ilə Avropa və dünya çempionatları, eləcə də müxtəlif səviyyəli beynəlxalq turnirlər mütəmadi olaraq keçirilir. Hazırda bu karate üslubu dünyanın 48 ölkəsində rəsmi şəkildə təmsil olunur və geniş beynəlxalq şəbəkə vasitəsilə inkişaf etdirilir.
Azərbaycan Respublikasında Şorinciryu Kenkokan Karate-do Koşiki karate üslubu da ardıcıl şəkildə inkişaf etdirilir. Ölkəmizdə bu fənn üzrə 7 məşqçi-müəllim fəaliyyət göstərir və həmin mütəxəssislər eyni zamanda koşiki və kudo istiqamətləri üzrə də idmançıların hazırlanması ilə məşğul olurlar. Bu, gənc nəslin çoxşaxəli döyüş hazırlığının formalaşdırılmasına və beynəlxalq standartlara uyğun kadr potensialının yaradılmasına şərait yaradır.
Azərbaycanda Şorinciryu Kenkokan Karate-do Koşiki karate üslubunun rəsmi nümayəndəsi 6-cı dan qara kəmər ustası Rafael Bunyatovdur. O, bu istiqamətin ölkəmizdə təşkili, beynəlxalq əlaqələrin genişləndirilməsi və milli məşqçi-idmançı potensialının formalaşdırılması sahəsində mühüm xidmətlər göstərmişdir.
