Kudo (Daido Juku)
(Kudo International Federation)
Kudo müasir döyüş sənətlərinin sintezinə əsaslanan, yüksək fiziki hazırlıq, dözümlülük və real döyüş texnikalarını özündə birləşdirən beynəlxalq idman növüdür. Bu sistem zərbə, atma və yerüstü mübarizə elementlərini vahid qaydalar çərçivəsində birləşdirərək idmançının hərtərəfli hazırlanmasına xidmət edir. Kudo həm texniki, həm də mənəvi baxımdan intizam, iradə və özünə nəzarət prinsiplərinə əsaslanan müasir budo məktəbi kimi tanınır.
Kudo International Federation xətti ilə beynəlxalq arenada dünya və Avropa çempionatları, eləcə də müxtəlif səviyyəli rəsmi turnirlər mütəmadi olaraq keçirilir. Bu yarışlar kudo idman növünün qlobal miqyasda inkişafına, vahid qayda və standartların tətbiqinə, hakim və məşqçi kadrlarının hazırlanmasına mühüm töhfə verir.
Azərbaycan Respublikasında kudo idman növü də ardıcıl şəkildə inkişaf etdirilir. Hazırda ölkəmizdə bu fənn üzrə 7 məşqçi-müəllim fəaliyyət göstərir və həmin mütəxəssislər eyni zamanda koşiki və kudo istiqamətləri üzrə idmançıların hazırlanması ilə məşğul olurlar. Bu, döyüş sənətlərinin kompleks şəkildə tədrisinə və gənc nəslin yüksək səviyyədə fiziki-mənəvi tərbiyəsinə şərait yaradır.
Azərbaycanda kudo (Daido Juku) idman növünün rəsmi nümayəndəsi 3-cü dan qara kəmər ustası Vəliyulla Bunyatovdur. O, bu istiqamətin ölkəmizdə təşkili, beynəlxalq standartlara uyğun inkişafı və milli məşqçi-idmançı potensialının formalaşdırılması sahəsində fəal fəaliyyət göstərir.
