Ənənəvi karate üslubu
Ənənəvi karate üslubu klassik karate məktəblərinin texniki, fəlsəfi və mənəvi əsaslarını qoruyub saxlayan, intizam, hörmət, özünə nəzarət və yüksək döyüş mədəniyyətini ön plana çəkən beynəlxalq karate istiqamətidir. Bu sistem çərçivəsində dünya üzrə 75 ölkə müxtəlif beynəlxalq federasiya və assosiasiyalarda təmsil olunur, mütəmadi olaraq dünya və qitə çempionatları, beynəlxalq seminarlar və turnirlər keçirilir.
Ənənəvi karate yarış və təlim sistemi kata və kumite ilə yanaşı, klassik budo dəyərlərinin – etik davranış, müəllim-şagird münasibətləri, mərasim qaydaları və döyüş fəlsəfəsinin qorunmasına xüsusi önəm verir. Bu üslub karate sənətinin tarixi köklərini və saf texniki formalarını gələcək nəsillərə ötürmək məqsədi daşıyır.
Azərbaycan Respublikasında ənənəvi karate üslubu da inkişaf etməkdə olan sahələrdən biridir. Hazırda ölkəmizdə bu fənn üzrə 15-dək məşqçi-müəllim fəaliyyət göstərir və gənclərin fiziki hazırlığı ilə yanaşı, mənəvi tərbiyəsinin formalaşdırılmasına töhfə verir.
Azərbaycanda ənənəvi karate üslubunun rəsmi nümayəndəsi əməkdar məşqçi, 8-ci dan qara kəmər ustası Əhməd Əfəndidir. O, uzun illər ərzində klassik karate məktəblərinin ölkəmizdə inkişafı, beynəlxalq əlaqələrin genişləndirilməsi və milli kadr potensialının formalaşdırılması istiqamətində mühüm xidmətlər göstərmişdir.
