Kyokuşin (Kay) SENŞİ karate üslubu
Kyokuşin (Kay) SENŞİ karate üslubu beynəlxalq turnirlərlə geniş yayılmış, tamkontakt döyüş qaydalarına əsaslanan və yüksək fiziki hazırlıq, dözümlülük, iradə və intizam tələb edən müasir karate istiqamətlərindən biridir. Bu üslub Kyokuşin ənənələrini qorumaqla yanaşı, onları müasir idman tələblərinə uyğun şəkildə inkişaf etdirən Kyokushin World Union (KWU) çərçivəsində fəaliyyət göstərir və SENSHI beynəlxalq peşəkar turnir seriyası vasitəsilə dünya miqyasında tanınır.
Hazırda Kyokuşin (Kay) SENŞİ sistemi 90-dan artıq ölkədə fəaliyyət göstərir və Kyokuşin Dünya Birliyi Assosiasiyası kimi bir sıra beynəlxalq təşkilatların birliyini özündə cəmləşdirir. Bu istiqamət üzrə dünya və qitə çempionatları, beynəlxalq turnirlər, peşəkar SENSHI döyüş gecələri təşkil olunur, idmançıların və məşqçilərin hazırlığı üçün vahid metodiki sistem tətbiq edilir.
Azərbaycan Respublikasında Kyokuşin (Kay) SENŞİ karate üslubu uğurla inkişaf etdirilir. Hazırda ölkəmizdə bu fənn üzrə 70-dək məşqçi-müəllim fəaliyyət göstərir və gənclərin fiziki və mənəvi tərbiyəsində, yüksək idman nəticələrinin əldə olunmasında mühüm rol oynayır.
Azərbaycanda Kyokuşin (Kay) SENŞİ karate üslubunun rəsmi nümayəndəsi əməkdar məşqçi, 5-ci dan qara kəmər ustası Qabil Sayadovdur. O, bu istiqamətin ölkəmizdə təşkili, beynəlxalq standartlara uyğun inkişafı və milli kadr potensialının formalaşdırılması sahəsində əhəmiyyətli xidmətlər göstərmişdir.
