Fullkontakt Karate (World Fullcontact Karate Organization – Shinkyokushinkai)
Şinkyokuşinkay tamkontakt karate sistemi fiziki güc, dözümlülük və yüksək iradə tələb edən, klassik kyokuşin ənənələri üzərində formalaşmış beynəlxalq idman növüdür. Dünya üzrə 105 ölkədə rəsmi federasiya və təşkilatlar tərəfindən təmsil olunan bu sistem, sərt qaydaları, real döyüş texnikası və yüksək hazırlıq standartları ilə seçilir.
Şinkyokuşinkay karate idmançıların fiziki möhkəmliyi ilə yanaşı, mənəvi dayanıqlığının, intizamının və özünə nəzarət bacarığının formalaşmasına xidmət edir. Beynəlxalq səviyyədə dünya və qitə çempionatları, müxtəlif yaş qrupları üzrə turnirlər keçirilir, hakim və məşqçi hazırlığı üzrə vahid metodiki sistem tətbiq olunur.
Azərbaycan Respublikasında da bu karate üslubu uğurla inkişaf etdirilir. Hazırda ölkəmizdə 60-dək peşəkar məşqçi-müəllim Şinkyokuşinkay sistemi üzrə minlərlə idmançının hazırlanması ilə məşğul olur, gənc nəslin sağlam həyat tərzinə cəlb edilməsi və yüksək idman nailiyyətlərinin əldə olunması istiqamətində ardıcıl fəaliyyət göstərir.
Azərbaycanda Shinkyokushinkai üzrə rəsmi nümayəndə, əməkdar məşqçi, 6-cı dan qara kəmər ustası Allahverdi Rüstəmovdur. O, uzun illər ərzində bu tamkontakt karate növünün ölkəmizdə təşkili, beynəlxalq standartlara uyğun inkişafı, milli məşqçi və idmançı kadrlarının hazırlanması istiqamətində mühüm xidmətlər göstərmişdir.
