Qocyu-Ryu karate üslubu
(International Okinawan Goju-Ryu Karate-do Federation)
Qocyu-Ryu karate üslubu Okinava karate məktəbinin klassik ənənələrinə əsaslanan, fiziki güc ilə daxili tarazlığın, sərtliklə yumşaqlığın vəhdətini özündə birləşdirən qədim və dərin fəlsəfəyə malik döyüş sənətidir. Bu üslubun əsasını düzgün nəfəs texnikası, möhkəm dayaq mövqeləri, yaxın məsafədə effektiv döyüş üsulları və yüksək intizam təşkil edir.
1998-ci ildən etibarən beynəlxalq yarışlar keçirilməsə də, bu məktəbin klassik irsinin qorunub saxlanılması və inkişaf etdirilməsi məqsədilə mütəmadi olaraq beynəlxalq seminarlar, ustad dərsləri və metodiki toplantılar təşkil olunur. Həmin seminarlar çərçivəsində dünyanın müxtəlif ölkələrindən olan mütəxəssislər bir araya gələrək Qocyu-Ryu karate üslubunun texniki və fəlsəfi əsaslarını gənc nəsillərə ötürürlər.
Azərbaycan Respublikasında Qocyu-Ryu karate üslubu da klassik karate məktəbləri sırasında öz layiqli yerini tutur. Hazırda ölkəmizdə bu fənn üzrə 14 məşqçi-müəllim fəaliyyət göstərir və ənənəvi Okinava karate irsinin qorunması, təbliği və inkişafı istiqamətində ardıcıl iş aparılır.
Azərbaycanda Qocyu-Ryu karate üslubunun rəsmi nümayəndəsi əməkdar idman xadimi, 5-ci dan qara kəmər ustası Tarverdi Allahverdiyevdir. O, uzun illər ərzində bu klassik karate məktəbinin ölkəmizdə inkişafı, beynəlxalq əlaqələrin saxlanılması və milli kadr potensialının formalaşdırılması sahəsində mühüm xidmətlər göstərmişdir.
