Vado-ryu karate üslubu
(International Wado-Ryu Federation)
Vado-ryu karate üslubu Yaponiyanın klassik karate məktəblərindən biri olmaqla, sürət, çeviklik və bədənin təbii hərəkət mexanikasına əsaslanan, zərifliklə effektivliyi birləşdirən döyüş sənətidir. Bu üslubun əsas fəlsəfəsini qarşıdurmadan yayınma, harmoniyanın qorunması və texnikaların minimum qüvvə ilə maksimum səmərəlilik prinsipi təşkil edir.
International Wado-Ryu Federation xətti ilə Vado-ryu karate üzrə mütəmadi olaraq dünya və Avropa çempionatları, beynəlxalq turnirlər, seminarlar və təlim toplanışları keçirilir. Hazırda bu üslub dünyanın 51 ölkəsində rəsmi şəkildə təmsil olunur və beynəlxalq karate ictimaiyyətində özünəməxsus nüfuza malikdir.
Azərbaycan Respublikasında Vado-ryu karate üslubu da inkişaf edən klassik karate istiqamətlərindən biridir. Hazırda ölkəmizdə bu fənn üzrə 4 məşqçi-müəllim fəaliyyət göstərir və gənc idmançıların texniki və mənəvi hazırlığının yüksəldilməsi istiqamətində iş aparırlar.
Azərbaycanda Vado-ryu karate üslubunun rəsmi nümayəndəsi 3-cü dan qara kəmər ustası Gündüz Mahmudovdur. O, bu məktəbin ölkəmizdə təşkili, beynəlxalq əlaqələrin qurulması və milli kadr potensialının formalaşdırılması sahəsində fəaliyyət göstərir.
