Bolqarıstanın Varna / Kamçiya şəhərlərində keçirilən “KWU-SENSHI” üzrə dünya kubokunda uğur qazanan Azərbaycan milli komandası bu gün Vətənə qayıdıb. Yarış və beynəlxalq yay təlim-məşq toplanışlarında yüksək çıxış edən idmançılarımız Heydər Əliyev adına Beynəlxalq Hava Limanında böyük coşqu ilə qarşılanıb.

Milli komandaya rəhbərlik edən Azərbaycan Karate Federasiyasının baş katibi və “KWU-WFKF” üzrə Azərbaycan nümayəndəsi Qabil Sayadov, komandanın çıxışını uğurlu qiymətləndirib və yaradılan yüksək şəraitə görə ölkə başçısı İlham Əliyevə, Federasiyanın prezidenti Ülvi Quliyevə və idarə heyətinə dərin təşəkkürünü bildirib:

“Bu nəticələrin təməlində ölkəmizdə idmana göstərilən diqqət və federasiya rəhbərliyinin davamlı dəstəyi dayanır. Biz bu etimada layiq olmaq üçün əlimizdən gələni edirik.”

Yarışda fərqlənən iki idmançımız  Selcan Babayeva (16-17 yaş, +65 kq) qızıl, Cavid Kazımlı (16-17 yaş, +75 kq) isə gümüş medal qazanaraq Azərbaycanın idman tarixinə növbəti uğurlu nəticələri yazdırıblar. Gənc karateçilərin bu nailiyyəti onların şəxsi məşqçiləri  Vidadi Xəlilov və Vüsal Məmmədovun uzunmüddətli zəhmətinin və peşəkar hazırlıq prosesinin bariz nümunəsidir.

Qarşılanma mərasimində idmançıları və məşqçiləri AKF prezidentinin köməkçisi, mətbuat xidmətinin rəhbəri Vüsal Abdullazadə, media nümayəndələri, idmançıların ailə üzvləri və çoxsaylı azarkeşlər qarşılayıb. Milli komanda üzvləri alqışlar, çiçəklər və bayraqlar altında böyük ruh yüksəkliyi ilə qarşılanıblar.

Gələcək planlara toxunan Qabil Sayadov bildirib:

“SENSHI” yarışları dünya səviyyəsində yüksək nüfuza malik platformadır. Qarşıdakı aylarda bu arenada daha güclü heyətlə çıxış etməyi planlaşdırırıq. Təlim-məşq prosesi artıq mərhələli və sistemli şəkildə təşkil olunub.

O qeyd edib ki, Azərbaycan Karate Federasiyasının nəzdində fəaliyyət göstərən “KWU-WFKF” Birliyi növbəti beynəlxalq yarışlara hazırlıqlarını davam etdirir:

“Məqsədimiz yalnız medallar qazanmaq deyil, həm də Azərbaycan karatesini beynəlxalq arenada sistemli şəkildə tanıtmaq və möhkəmləndirməkdir.”

Azərbaycan Karate Federasiyasının rəhbərliyi ilə “Arpaçay Karate Klubu”nun təşkilatçılığı ilə həyata keçirilən  “Zəfər Kuboku” karate turnirinin açılış mərasimi iyulun 5-də yüksək təşkilatçılıq şəraitində keçirilib.

Tədbirdə əvvəlcə Azərbaycan Respublikasının Dövlət Himni səsləndirilib. Ulu öndər Heydər Əliyevin və torpaqlarımızın azadlığı uğrunda canlarından keçmiş şəhidlərimizin əziz xatirəsi bir dəqiqəlik sükutla yad olunub.

Açılış mərasimində çıxış edən Azərbaycan Karate Federasiyasının prezidenti, Milli Məclisin deputatı Ülvi Quliyev iştirakçıları və qonaqları salamlayaraq tədbirin əhəmiyyətindən bəhs edib. O qeyd edib ki, ölkəmizdə karate idman növünün inkişafı və geniş vüsət alması məhz ümummilli lider Heydər Əliyevin idmana, gənclərimizin sağlam ruhda böyüməsinə göstərdiyi xüsusi qayğının məntiqi nəticəsidir. Ülvi Quliyev bildirib ki, bu gün Prezident cənab İlham Əliyevin rəhbərliyi ilə ölkəmizdə idmanın inkişafına geniş imkanlar yaradılıb, idman infrastrukturu müasirləşdirilib və beynəlxalq arenalarda Azərbaycan idmançılarının qələbələri dövlətimizin gücünü bir daha nümayiş etdirir.

Federasiya rəhbəri vurğulayıb ki, Zəfər Kuboku turniri yalnız idman yarışı deyil, həm də xalqımızın 44 günlük Vətən müharibəsində qazandığı tarixi zəfərin, şəhidlərimizin müqəddəs ruhuna ehtiramın, gənclərimizin vətənpərvər ruhda böyüməsinin rəmzidir. O, turnirdə iştirak edən idmançılara uğurlar arzulayıb və bu yarışın gənc karateçilər üçün mühüm məktəb olacağını bildirib.

Açılış mərasimində çıxış edən millət vəkilləri  Fazil Mustafa və Vüqar Rəhimzadə də tədbirin əhəmiyyətini yüksək qiymətləndirib, idmançılarımıza uğurlar arzulayıblar. Onların çıxışlarında əsas vurğular belə olub:

Fazil Mustafanın çıxışı:

“Bu cür mötəbər idman tədbirləri Azərbaycanın gücünü, xalqımızın birliyini və gənclərimizin vətənpərvərlik ruhunu bir daha nümayiş etdirir. Zəfər Kuboku kimi yarışlar gənc nəslin sağlam ruhda, dövlətinə və millətinə bağlı böyüməsinə xidmət edir.”

Vüqar Rəhimzadənin çıxışı:

“Zəfər Kuboku kimi yarışlar yalnız idman tədbiri deyil, həm də qələbə ideologiyasının, milli qürurun təcəssümüdür. Burada iştirak edən hər bir gənc karateçi döyüş meydanında qazandığımız zəfərlərin idman arenalarında davam etdirilməsinə töhfə verir.”

Tədbirdə idman ictimaiyyətinin tanınmış nümayəndələri, dövlət qurumlarının rəsmiləri, ictimaiyyət xadimləri və digər qonaqlar iştirak ediblər.

Tədbirdə həmçinin karate idman növünün inkişafında göstərdiyi  xidmətlərə görə Azərbaycan Karate Federasiyası tərəfindən “Arpaçay İdman Birliyi”nin rəhbəri Əli Əsgərova fəxri 5-ci dan qara kəmər təqdim olunub.

Qeyd edək ki, 6 iyul tarixində yekunlaşacaq “Zəfər Kuboku” turnirində  Azərbaycanın müxtəlif bölgələrindən 800- dən çox karateçi mübarizə aparır. Turnirin əsas məqsədi gənclər arasında sağlam həyat tərzini təşviq etmək, karate idman növünün inkişafını sürətləndirmək, həmçinin Azərbaycan xalqının qəhrəmanlıq salnaməsinə çevrilmiş Zəfər Gününün əzəmətini gənc nəsillərə aşılamadır.

Azərbaycan Karate Federasiyası və “Arpaçay Karate Klubu” bu turnirin yüksək səviyyədə təşkili üçün bütün zəruri tədbirləri həyata keçirib. 

Azərbaycan Karate Federasiyasının prezidenti Ülvi Quliyev, son dönəmlərdə karate idman növünün ölkəmizdə inkişafı, dövlətin idman siyasəti və Prezident İlham Əliyevin bu sahəyə olan diqqətindən bəhs edib.

Ülvi Quliyev, Azərbaycanın idman siyasətinin güclü bir şəkildə formalaşdırıldığını və karate idman növünün bu siyasət çərçivəsində xüsusi diqqət gördüyünü vurğuladı. O, Prezident İlham Əliyevin idmançılara verdiyi yüksək mükafatlar və müxtəlif sahələrdəki dəstəyini qeyd edərək, bu yanaşmanın idmançılara daha böyük uğurlar qazandırmaq üçün motivasiya yaratdığını bildirdi.

“Dövlətimizin rəhbərinin idmana olan qayğısı, xüsusilə də karateçilərin beynəlxalq arenada qazandıqları uğurları ilə ölkəmizi layiqincə təmsil etməsi çox vacibdir. Bu dəstək bizi daha da ruhlandırır və uğurlara gedən yolda bizə güc verir.” – deyə Ülvi Quliyev qeyd etdi.

O, həmçinin, Sərhədçi Olimpiya İdman Mərkəzi kimi müasir idman infrastrukturunun yaradılmasının və karateçilərin beynəlxalq yarışlarda təmsil olunması üçün geniş imkanların təmin edilməsinin, ölkəmizdə karate idmanının daha da inkişaf etməsinə təkan verdiyini bildirib.

Ülvi Quliyev, Azərbaycan Karate Federasiyasının gələcəkdə də dövlətin dəstəyi ilə beynəlxalq miqyasda daha çox uğurlar qazanmaq üçün səylərini davam etdirəcəyini vurğuladı.

4-6 aprel tarixlərində Bakı daha bir mötəbər idman tədbirinə ev sahibliyi etdi. Azərbaycan Karate Federasiyasının nəzdində fəaliyyət göstərən “Azərbaycan Karate Təşkilatı”nın təşkilatçılığı ilə reallaşan “Qran Pri” Bakı 2025 beynəlxalq karate turniri uğurla başa çatdı. Yarış ölkəmizin karate idman növü üzrə beynəlxalq arenadakı nüfuzunun artmasına və idmançılarımızın peşəkar təcrübəsinin zənginləşməsinə mühüm töhfə verdi.

Turnirin ilk günü baş tutan təntənəli açılış mərasimində Azərbaycan Karate Federasiyasının prezidenti Ülvi Quliyev çıxış edərək iştirakçıları, qonaqları və azarkeşləri səmimi şəkildə salamladı. O, çıxışında Azərbaycanın idman ölkəsi olduğunu vurğulayaraq, ölkəmizdə karate idman növünün sürətlə inkişaf etdiyini və bu kimi beynəlxalq yarışların təşkilinin bu inkişafın bariz nümunəsi olduğunu qeyd etdi.

Açılış mərasimi çərçivəsində karatenin Azərbaycanda inkişafında xüsusi xidmətləri olmuş bir sıra idman mütəxəssisləri, məşqçilər və veteran karateçilər xüsusi diplom və plaketlərlə təltif olundular. Bu jest tədbir iştirakçıları tərəfindən böyük rəğbətlə qarşılandı və federasiyanın idmana göstərdiyi diqqətin təzahürü kimi qiymətləndirildi.

Turnirdə 14 ölkəni təmsil edən 1200-ə yaxın karateçi iştirak etdi. Yarışlar həm kata, həm də kumite üzrə müxtəlif yaş və çəki kateqoriyalarında təşkil olundu. Müxtəlif ölkələrdən gəlmiş idmançılar arasında gərgin və maraqlı qarşılaşmalar baş tutdu. Bütün döyüşlər beynəlxalq standartlara uyğun şəkildə, peşəkar hakim heyəti tərəfindən idarə olundu.

Yarışın sonunda ümumi nəticələrə əsasən, Azərbaycan komandası medal sıralamasında birinci yerə yüksəldi. Yerli idmançılarımız yüksək peşəkarlıq nümayiş etdirərək həm fərdi, həm də komanda şəklində uğurlu çıxışlar etdilər. Qazaxıstan komandası ikinci, Türkiyə komandası isə üçüncü yerə layiq görüldü.

“Qran Pri” Bakı 2025 turniri idmançılar üçün həm rəqabət, həm də dostluq və təcrübə mübadiləsi baxımından dəyərli bir platformaya çevrildi. Eyni zamanda bu turnir bir daha göstərdi ki, Azərbaycan karate idman növü üzrə regionda liderliyini qoruyur və bu sahədə beynəlxalq əməkdaşlıqlara xüsusi önəm verir.

Azərbaycan Karate Federasiyası (AKF) Dünya Karate Federasiyasına (WKF) rəsmi üzv qəbul edilib.

Əvvəllər ölkəmizdə 20-ə yaxın üslub üzrə karate federasiyaları mövcud idi. Lakin son illər Gənclər və İdman Nazirliyinin apardığı idman siyasəti və “Bədən tərbiyəsi və idman haqqında” Azərbaycan Respublikasının Qanununun müvafiq müddəalarına əsasən, “Azərbaycan Respublikasının ərazisində bir idman növü üzrə yalnız bir ictimai birlik respublika idman federasiyası qismində akkreditasiya oluna bilər”. Göründüyü kimi bu qanunun tələblərinə uyğun olaraq karate idman növü üzrə Azərbaycanda akkreditasiyadan keçmiş yeganə federasiya Azərbaycan Karate Federasiyasıdır.

Azərbaycan Karate Federasiyası (AKF) prezidenti Ülvi Quliyevin rəhbərliyi altında ölkəmizdə müxtəlif karate üslublarının vahid sistem altında birləşdirilməsi, karate idman növünün inkişafı və beynəlxalq əlaqələrin möhkəmləndirilməsi istiqamətində atılmış mühüm addımlar, bu idman növünün inkişafına mühüm töhfələr və dəstək verməkdədir.

Məhz bu islahatların bariz nümunəsi olaraq, AKF yeni tərkibdə formalaşmış və Dünya Karate Federasiyasına üzv qəbul edilmişdir.